அரசியலுக்கு வாரிசுகள் வரக்கூடாது என்று எந்த சட்டத்திலும் கூறவில்லை ஓ.பன்னீர்செல்வம் பேட்டி


அரசியலுக்கு வாரிசுகள் வரக்கூடாது என்று எந்த சட்டத்திலும் கூறவில்லை ஓ.பன்னீர்செல்வம் பேட்டி
x
தினத்தந்தி 20 March 2019 10:15 PM GMT (Updated: 2019-03-21T01:18:15+05:30)

அரசியலுக்கு வாரிசுகள் வரக்கூடாது என்று எந்த சட்டத்திலும் கூறவில்லை என்று துணை முதல்- அமைச்சர் ஓ.பன்னீர்செல்வம் கூறினார்.

மதுரை, 

தேனி நாடாளுமன்ற தொகுதியில் துணை முதல்-அமைச்சர் ஓ.பன்னீர்செல்வத்தின் மகனான ரவீந்திரநாத்குமார் அ.தி.மு.க. சார்பில் வேட்பாளராக நிறுத்தப்பட்டுள்ளார். அவர், மதுரை மாவட்டம் பாலமேடு அருகே மஞ்சமலைசுவாமி கோவிலில் நேற்று சாமி கும்பிட்டுவிட்டு பிரசாரத்தை தொடங்கினார்.

அவருக்கு ஆதரவாக துணை முதல்-அமைச்சர் ஓ.பன்னீர்செல்வம், தேனி தொகுதிக்குட்பட்ட மதுரை மாவட்ட பகுதியான அலங்காநல்லூர் பகுதிகளில் பிரசாரம் செய்தார்.

பின்னர் ஓ.பன்னீர்செல்வம் நிருபர்களுக்கு அளித்த பேட்டியின் போது கூறியதாவது:-

நடைபெற உள்ள நாடாளுமன்ற தேர்தலில் அ.தி.மு.க. கூட்டணி 40 தொகுதிகளிலும் வெற்றிபெறும். அ.தி.மு.க. என்பது எம்.ஜி.ஆர்., ஜெயலலிதா ஆகிய தலைவர்களால் வழிநடத்தப்பட்ட இயக்கம். இதில் உள்ள அடிப்படை கட்டமைப்பு தொண்டர்களால் அமைக்கப்பட்டது. எனவே அ.தி.மு.க. ஆட்சிதான் தமிழகத்தில் நீடிக்கும்.

அ.தி.மு.க.வில் கருத்து வேறுபாடுகள் உள்ளதாக செய்திகள் வருகின்றன. அப்படி எதுவும் கிடையாது. தினகரன் கட்சியாலும், அ.தி.மு.க.வில் இருந்து பிரிந்து சென்றவர்களாலும் வாக்குகள் பாதிக்காது.

அரசியலுக்கு வாரிசுகள் வரக்கூடாது என்று எந்த சட்டத்திலும் கூறவில்லை. கட்சியில் செயல்பாடுகள் மற்றும் தகுதி அடிப்படையிலேயே வேட்பாளர்களுக்கு போட்டியிட வாய்ப்புகள் வழங்கப்பட்டுள்ளன.

இவ்வாறு அவர் கூறினார்.

Next Story