7 பேர் விடுதலை விவகாரத்தில் நீதிமன்றத்திற்கோ, கவர்னருக்கோ அழுத்தம் தரக்கூடாது - கே.எஸ்.அழகிரி பேட்டி

திருப்பூர்

காங்கிரஸ் கட்சியின் திருப்பூர் மாவட்ட நிர்வாகிகள் கூட்டம் குமரன் ரோட்டில் உள்ள கட்சி அலுவலகத்தில் நேற்று நடந்தது. கூட்டத்தில் தமிழக காங்கிரஸ் கட்சித்தலைவர் கே.எஸ்.அழகிரி கலந்து கொண்டு பேசினார்.

முன்னதாக அவர் நிருபர்களுக்கு பேட்டி அளித்தார். அப்போது அவர் கூறியதாவது:-

தேனி நாடாளுமன்ற தொகுதியில் 2 வாக்குச்சாவடிகளுக்கு மறுதேர்தல் நடத்தப்படும் என்று தேர்தல் ஆணையம் அறிவித்துள்ளது. இந்த தொகுதியில் போட்டியிட்ட எந்த வேட்பாளர்களும் மறு தேர்தல் நடத்த வேண்டும் என்று கேட்காதபோது, தேர்தல் ஆணையம் ஏன் மறுதேர்தல் நடத்த முடிவு செய்துள்ளது. இதற்கு தேர்தல் ஆணையம் பதில் அளிக்க வேண்டும். 3-ம் அணி இன்றைய இந்திய அரசியல் சூழலில் சாத்தியம் இல்லை.

வேடிக்கை பார்க்கிறது

மதசார்பற்ற சக்திகள், இடதுசாரி சக்திகளை ஒன்று திரட்டுவதன் மூலம் இந்தியாவில் ஒரு ஆரோக்கியமான அரசியலை உருவாக்க முடியும். அமெரிக்காவின் தேர்தல் முறையை விட இந்தியாவின் தேர்தல் முறை சிறப்பானது. அவ்வளவு புகழ் மற்றும் பெருமை உடைய தேர்தல் ஆணையம் தற்போது பணநாயகத்தின் முன்பு கைகட்டி, வேடிக்கை பார்த்து கொண்டு நிற்பது வேதனையளிக்கிறது.

டி.என்.சேஷன் இருந்தபோது தேர்தல் ஆணையம் வானளாவிய அதிகாரத்தை கொண்டிருந்தது. ஆனால் தேர்தல் ஆணையம் இப்போது தன்னிச்சையாக செயல்பட முடியவில்லை. மக்கள் அப்பாவிகளாக இருக்கும் நிலையில், அரசியல் கட்சிகள் தான், வாக்குக்காக மக்களிடம் பணத்தை திணித்து வருகின்றன.

அழுத்தம் தரக்கூடாது

தேர்தலில் பணம் வழங்கும் கலாசாரத்தை நாம் அழிக்க வேண்டும். ராஜீவ்காந்தி கொலை வழக்கில் தண்டனை பெற்று சிறையில் இருக்கும் 7 பேரின் விடுதலை குறித்து கவர்னர் முடிவெடுக்கலாம் என்று உச்சநீதிமன்றம் ஒரு ஆலோசனையை மட்டுமே வழங்கியுள்ளது. தமிழக அமைச்சரவையின் அந்த முடிவை ஏற்பதும், மறுப்பதும் கவர்னரின் முடிவு. ராஜீவ்காந்தி கொலையாளிகளை மன்னித்துவிட்டோம் என காங்கிரஸ் தலைமை ஏற்கனவே சொல்லிவிட்டது.

இந்த கொலை வழக்கில் சட்டம் தன் கடமையை செய்யட்டும் என்பது தான் எங்கள் நிலைப்பாடு. 25 ஆண்டுகளுக்கு மேலாக எவ்வளவோ தமிழர்கள் சிறையில் இருக்கிறார்கள். அவர்களையும் விடுதலை செய்யட்டும். 7 பேரையும் விடுதலை செய்யட்டும். ஆனால் எந்த காரணத்தை கொண்டும் நீதிமன்றத்திற்கோ அல்லது கவர்னருக்கோ அழுத்தம் தரக்கூடாது. நீதியை சிறு, சிறு குழுக்கள் முடிவு செய்யக்கூடாது.

இவ்வாறு அவர் கூறினார்.