தவறு செய்யும் பொதுப்பணித்துறை - நெடுஞ்சாலைத்துறை அதிகாரிகள் மீது நடவடிக்கை எடுக்க தனிப்பிரிவு

சென்னை,

சட்டப்பேரவையில் நகராட்சி நிர்வாகம் மற்றும் ஊரக வளர்ச்சிதுறைகளின் மானிய கோரிக்கை மீதான விவாதத்தின் போது பேசிய எதிர்க்கட்சி துணை தலைவர் துரைமுருகன், சாலைகளில் தடுப்பு அமைக்கும் பணிகள் முறையாக மேற்கொள்ளப்படவில்லை என தெரிவித்தார். அதற்கு பதிலளித்த முதலமைச்சர், எந்த இடத்தில் பணிகள் சரியாக செய்யவில்லை என்பதை சுட்டிக்காட்டினால் அதை ஆய்வு செய்து, தவறு இருக்கும் பட்சத்தில் அதிகாரிகள் மீது நடவடிக்கை எடுக்கப்படும் என உறுதியளித்தார்.

மேலும் நெடுஞ்சாலை துறை, பொதுப்பணித்துறை பணிகளின் தரத்தை ஆய்வு செய்ய தனிப்பிரிவு உருவாக்கப்பட்டுள்ளதாகவும், அவ்வாறு அதிகாரிகள் ஆய்வு செய்யும் போது தவறு இருக்கும் பட்சத்தில், அவர்கள் மீது நடவடிக்கை எடுக்கப்படும் என்றும் தெரிவித்தார்.

பின்னர் பேசிய துரைமுருகன், பாதாள சாக்கடை திட்டம் நடைபெறும் இடங்களில் சாலைகள் முழுமையாக போடப்படவில்லை என குற்றம் சாட்டினார்.

இதற்கு பதிலளித்து பேசிய முதலமைச்சர், ஒரு திட்டம் போடும்போதே சாலைகளை சீரமைப்பதற்கான நிதியையும் ஒதுக்கீடு செய்து திட்டம் துவங்க வேண்டும். ஆனால் திமுக அதுபோல் செய்யாமல் பாதியில் விட்டுவிட்டதாகவும், அவ்வாறு விடப்பட்ட இடங்களில் அதிமுக அரசு பொறுப்பேற்ற பிறகு தான் சாலைகள் அமைக்கப்பட்டதாகவும் பதிலளித்தார்.