நாங்குநேரி, விக்கிரவாண்டி தொகுதிகளில் இடைத்தேர்தல் பிரசாரம் சூடு பிடித்தது

நெல்லை,

அதன்படி, நாங்குநேரி தொகுதியில் அ.தி.மு.க. வேட்பாளர் ரெட்டியார்பட்டி நாராயணனுக்கு ஆதரவாக தமிழக அமைச்சர்கள் தங்கமணி, திண்டுக்கல் சீனிவாசன், ராஜலட்சுமி, செல்லூர் ராஜூ, ராஜேந்திர பாலாஜி, காமராஜ், கடம்பூர் ராஜூ, எம்.ஆர்.விஜயபாஸ்கர், டாக்டர் விஜயபாஸ்கர், வளர்மதி, பாஸ்கரன், வெல்லமண்டி நடராஜன் ஆகிய 12 அமைச்சர்களும், ரவீந்திரநாத் எம்.பி., தமிழக அரசின் டெல்லி சிறப்பு பிரதிநிதி தளவாய் சுந்தரம் உள்ளிட்ட கட்சி பிரமுகர்கள் மற்றும் கூட்டணி கட்சி நிர்வாகிகளும் தொகுதியை முற்றுகையிட்டு தீவிர வாக்கு சேகரிப்பில் ஈடுபட்டு வருகின்றனர்.

முதல்-அமைச்சர் எடப்பாடி பழனிசாமி வருகிற 12, 13, 16 ஆகிய தேதிகளிலும், துணை முதல்-அமைச்சர் ஓ.பன்னீர்செல்வம் 15, 16, 18 ஆகிய தேதிகளிலும் நாங்குநேரி தொகுதியில் திறந்த ஜீப்பில் கிராமம், கிராமமாக சென்று அ.தி.மு.க. வேட்பாளருக்கு ஆதரவாக வாக்கு சேகரிக்க உள்ளனர்.

நாங்குநேரி தொகுதியில் போட்டியிடும் காங்கிரஸ் கட்சி வேட்பாளர் ரூபி மனோகரனுக்கு ஆதரவாக அந்த கட்சியின் மாநில தலைவர் கே.எஸ்.அழகிரி, அகில இந்திய செயலாளர் சஞ்சய் தத், மூத்த தலைவர் குமரிஅனந்தன், எம்.பி.க்கள் வசந்தகுமார், திருநாவுக்கரசர் ஆகியோரும், கூட்டணி கட்சியான தி.மு.க. நிர்வாகிகளும் ஆதரவு திரட்டி வருகிறார்கள்.

இந்த நிலையில் தி.மு.க. தலைவர் மு.க.ஸ்டாலின் ரூபி மனோகரனை ஆதரித்து வருகிற 10, 15, 16 ஆகிய தேதிகளில் வாக்கு சேகரிப்பில் ஈடுபடுகிறார். மேலும், கனிமொழி எம்.பி., மாநில இளைஞர் அணி செயலாளர் உதயநிதி ஸ்டாலின், விடுதலை சிறுத்தைகள் கட்சி தலைவர் தொல்.திருமாவளவன் உள்ளிட்டோரும் பிரசாரம் செய்கிறார்கள். வருகிற 14-ந் தேதி ம.தி.மு.க. பொதுச்செயலாளர் வைகோ பிரசாரம் செய்கிறார்.

நாம் தமிழர் கட்சி தலைமை ஒருங்கிணைப்பாளர் சீமான், வருகிற 7, 14, 15, 18 ஆகிய தேதிகளில் அக்கட்சி வேட்பாளர் ராஜநாராயணனை ஆதரித்து பிரசாரம் செய்கிறார்.

சுயேச்சை வேட்பாளர்களும் தங்கள் பிரசாரத்தை தொடங்கி உள்ளனர்.

விக்கிரவாண்டி தொகுதியில் அ.தி.மு.க. வேட்பாளர் முத்தமிழ்செல்வன், தி.மு.க. வேட்பாளர் புகழேந்தி, நாம் தமிழர் கட்சி வேட்பாளர் கந்தசாமி உள்பட 12 பேர் போட்டியிடுகின்றனர்.

அ.தி.மு.க. வேட்பாளர் முத்தமிழ்செல்வனை ஆதரித்து அமைச்சர்கள் சி.வி.சண்முகம், எம்.சி.சம்பத், பாண்டியராஜன், செங்கோட்டையன், துணை சபாநாயகர் பொள்ளாச்சி ஜெயராமன் மற்றும் கட்சி நிர்வாகிகள் விக்கிரவாண்டியில் முகாமிட்டு வாக்கு சேகரித்து வருகிறார்கள்.

இதேபோல் தி.மு.க. வேட்பாளர் புகழேந்தியை ஆதரித்து முன்னாள் அமைச்சர்கள் பொன்முடி, எ.வ.வேலு மற்றும் எம்.எல்.ஏ.க்கள், கட்சி நிர்வாகிகள் விக்கிரவாண்டியில் முகாமிட்டு வாக்கு சேகரித்து வருகிறார்கள். கனிமொழி எம்.பி.யும் வாக்கு சேகரித்தார்.

நாம் தமிழர் கட்சி வேட்பாளர் கந்தசாமியை ஆதரித்து, அக்கட்சியின் ஒருங்கிணைப்பாளர் சீமான் நேற்று முன்தினம் பிரசாரம் செய்தார்.

அந்த வகையில் முதல்- அமைச்சர் எடப்பாடி பழனிசாமி வருகிற 14, 15 மற்றும் 18-ந் தேதிகளிலும், துணை முதல்- அமைச்சர் ஓ.பன்னீர்செல்வம் 13, 14, 17-ந் தேதிகளிலும் பிரசாரம் செய்ய உள்ளனர்.

இதுதவிர பா.ம.க. நிறுவனர் டாக்டர் ராமதாஸ், இளைஞரணி தலைவர் டாக்டர் அன்புமணி ராமதாஸ், தே.மு.தி.க. பொருளாளர் பிரேமலதா விஜயகாந்த் ஆகியோரும் அ.தி.மு.க. வேட்பாளருக்கு வாக்கு சேகரிக்க உள்ளனர். தே.மு.தி.க. பொதுச்செயலாளர் விஜயகாந்தும் பிரசாரம் செய்ய வருவார் என எதிர்பார்க்கப்படுகிறது.

இதேபோல் தி.மு.க. வேட்பாளர் புகழேந்தியை ஆதரித்து அக்கட்சியின் தலைவர் மு.க.ஸ்டாலின் வருகிற 12, 13, 18, 19 ஆகிய தேதிகளிலும், இளைஞரணி செயலாளர் உதயநிதி ஸ்டாலின் 14, 15-ந்தேதிகளிலும் பிரசாரம் செய்ய உள்ளனர்.

மேலும், கூட்டணியில் உள்ள ம.தி.மு.க. பொதுச் செயலாளர் வைகோ வருகிற 9-ந்தேதியும், விடுதலை சிறுத்தைகள் கட்சியின் தலைவர் தொல்.திருமாவளவன் எம்.பி. மற்றும் காங்கிரஸ் கட்சி, கம்யூனிஸ்டு கட்சிகளின் முக்கிய தலைவர்களும் பிரசாரம் செய்கின்றனர்.

நாம் தமிழர் கட்சி வேட்பாளரை ஆதரித்து சீமான் 11, 12, 17-ந்தேதிகளில் பிரசாரம் செய்கிறார்.

2 தொகுதிகளிலும் முக்கிய தலைவர்கள் பிரசாரம் செய்வதால் தேர்தல் களம் சூடு பிடித்துள்ளது.