புத்தகம் வாங்க வைத்திருந்த உண்டியல் பணத்தை கொரோனா நிதியாக வழங்கிய மாற்றுத்திறனாளி இரட்டையர்கள்

ஈரோடு,

ஈரோடு கைக்கோளம் தோட்டம் பகுதியை சேர்ந்தவர் காதர் மொய்தீன். இவர் ஈரோட்டில் பள்ளிக்கூட மற்றும் அலுவலக பைகள் உற்பத்தி மற்றும் விற்பனை தொழில் செய்து வருகிறார். இவருக்கு பெர்னாஷ் அலி, பாஷிகா நிஷா என்று 2 மகள்கள் உள்ளனர். இவர்கள் 2 பேரும் இரட்டையர். பிறக்கும்போதே கை, கால்கள் மாற்றுத்திறன் கொண்டவர்களாக பிறந்தனர். தற்போது இவர்கள் 2 பேருக்கும் வயது 16 வயது ஆகிறது.

பெற்றோர் மற்றும் உதவியாளர்கள் உதவியின்றி எந்த பணியும் செய்ய முடியாத நிலையில் இருப்பவர்கள். இவர்கள் திருநகர் காலனியில் உள்ள ஒரு சிறப்பு குழந்தைகளுக்கான மையத்தில் கல்வி மற்றும் சிகிச்சை பெற்று வருகிறார்கள். ஈரோடு புத்தகத்திருவிழாவுக்கு வந்து ஆண்டு தோறும் புத்தகங்கள் வாங்கும் பழக்கத்தை வைத்து உள்ளனர். இதற்காக பெற்றோர் இவர்களுக்கு வழங்கும் பணத்தை உண்டியலில் சேமித்து வைப்பது வழக்கம்.

இந்த நிலையில் கொரோனா பாதிப்பு இவர்களுக்கு மிகவும் வருத்தத்தை ஏற்படுத்தியது. பாதிக்கப்பட்ட மக்களுக்கு உதவும் வகையில் ஏதேனும் செய்ய வேண்டும் என்ற எண்ணத்தில், தாங்கள் புத்தகம் வாங்க சேமித்த உண்டியல் தொகையை அப்படியே முதல்-அமைச்சர் நிவாரண நிதி திட்டத்தில் வழங்க முடிவு செய்தனர். அதன்படி நேற்று ஈரோடு மாவட்ட கலெக்டரின் முகாம் அலுவலகத்துக்கு பெர்னாஷ் அலி, பாஷிகா நிஷா ஆகியோர் பெற்றோர் காதர் மொய்தீன்-ஷரிபா ஆகியோருடன் வந்தனர்.

சற்றும் நடக்க முடியாமல் சக்கர நாற்காலியில் தள்ளிக்கொண்டு வரும் நிலையில் பாஷிகா நிஷாவும், கையில் ஊன்றுகோல்கள் உதவியுடன் தட்டுத்தடுமாறி நடக்கும் பெர்னாஷ் அலியும் கலெக்டர் முகாம் அலுவலகத்தை பிரமிப்பாக பார்த்தனர். இவர்கள் வந்திருக்கும் தகவல் அறிந்த கலெக்டர் சி.கதிரவன் தனது அலுவலகத்தை விட்டு வெளியே வந்து மகிழ்ச்சியுடன் அவர்களை வரவேற்று சிறிது நேரம் அவர்களுடன் பேசினார். பின்னர் 2 பேரும் தங்கள் சேமிப்பு உண்டியல்களை அப்படியே கலெக்டர் சி.கதிரவனிடம் ஒப்படைத்தனர்.

நெகிழ்ச்சியான இந்த நிகழ்வின்போது செல்வா சேரிடபிள் அறக்கட்டளை நிறுவனர் ஜெ.ஜெ.பாரதி மற்றும் அதிகாரிகள் உடன் இருந்தனர். 2 பேரும் வழங்கிய உண்டியல் திறக்கப்பட்டு எண்ணியபோது அதில் ரூ.4 ஆயிரத்து 392 இருந்தது. அந்த பணத்தை முதல்-அமைச்சர் கொரோனா நிவாரண நிதிக்கு அனுப்ப கலெக்டர் உத்தரவிட்டார்.