கைகளை ‘சானிடைசரால்’ சுத்தம் செய்த பின்னர் பட்டாசு வெடிக்கக்கூடாது - கீழ்ப்பாக்கம் அரசு மருத்துவமனை மருத்துவர் வேண்டுகோள்

சென்னை, 

கீழ்ப்பாக்கம் அரசு மருத்துவமனை தீக்காய சிகிச்சை துறை தலைவர் டாக்டர் ரமா தேவி நேற்று தந்தி தொலைக்காட்சிக்கு பேட்டி அளித்தார். அப்போது அவர் கூறியதாவது:-

தீபாவளி பண்டிகையின் போது எதிர்பாராத விதமாக ஏற்படும் தீக்காயங்களுக்கு உடனடியாக சிகிச்சை அளிக்க 10 படுக்கை வசதி கொண்ட தீபாவளி சிறப்பு வார்டு தயாராக உள்ளது. மேலும் இங்கு தயார் நிலையில் உள்ள 22 டாக்டர்கள் மற்றும் 25 ஊழியர்கள், சுழற்சி முறையில் பணியில் இருந்து தீக்காயம் அடைந்தவர்களுக்கு சிகிச்சை அளிப்பர். தற்போது தமிழகத்தில் கொரோனா தாக்கம் குறைந்து வருகிறபோதிலும் பட்டாசு வெடிக்கும் நேரத்தில் பொதுமக்கள் முககவசம் அணிந்து பட்டாசு வெடிக்கவேண்டும்.

கொரோனா நோயாளிகளுக்கு மூச்சுத்திணறல் ஏற்பட வாய்ப்புள்ளதால், வீட்டின் அருகில் கொரோனா பாதிப்புக்கு ஆளானவர்கள் இருந்தால் அதிகம் புகை வெளியேற்றும் வகையிலான பட்டாசுகள் வெடிப்பதை தவிர்க்கவும். மேலும் சில கொரோனா நோயாளிகளுக்கு, தொற்றின் தீவிர தாக்கத்தால் இருதய பாதிப்பும் ஏற்படுகிறது. எனவே அதிக சத்தத்துடன் வெடிக்கும் பட்டாசுகளையும் பொதுமக்கள் தவிர்த்தால் நல்லது.

‘சானிடைசர்’ கொண்டு சுத்தம் செய்யப்பட்ட கைகளுடன் பட்டாசு வெடித்தல் கூடாது. ‘சானிடைசர்களில்’ ‘ஆல்கஹால்’ கலந்துள்ளதால் எளிதில் தீப்பற்ற வாய்ப்பு உள்ளது. இவ்வாறு அவர் கூறினார்.