தமிழகத்தில் கொரோனா 2-வது அலையின் தாக்கம் குறைவு - அமைச்சர் விஜயபாஸ்கர் தகவல்

மயிலாடுதுறை, 

டெல்டா மாவட்டங்களில் கடந்த 6 நாட்களாக தொடர்ந்து கனமழை பெய்தது. இந்த கனமழையால் ஆறுகள், வாய்க்கால்களில் மழை நீர், வெள்ளமாக செல்கின்றன. குறிப்பாக மயிலாடுதுறை பகுதியில் உள்ள வடிகால் ஆறான அய்யாவையனாற்றில் மழை நீர் நிரம்பி வெள்ளமாக செல்வதால் ஆற்காடு, மொழையூர் உள்ளிட்ட பகுதிகளில் உடைப்பு ஏற்பட்டு குடியிருப்புகளையும், விளைநிலங்களையும் மழை நீர் சூழ்ந்துள்ளது.

இதனால் மயிலாடுதுறை அருகே உள்ள ராதாநல்லூர், ஆற்காடு உள்ளிட்ட கிராமங்களில் வெள்ளநீர் சூழ்ந்து குடியிருப்புகள் பாதிக்கப்பட்டுள்ளன. மேலும் மொழையூர் கிராமத்தில் ஆயிரத்திற்கும் மேற்பட்ட ஏக்கர் சம்பா பயிர்கள் நீரில் மூழ்கி பாதித்துள்ளன. இதனை நேற்று சுகாதாரத்துறை அமைச்சர் விஜயபாஸ்கர் நேரில் பார்வையிட்டார்.

பின்னர் அமைச்சர் விஜயபாஸ்கர் நிருபர்களிடம் கூறியதாவது:-

நாகை மாவட்டத்தில் 2-வது நாளாக பாதிக்கப்பட்ட பகுதிகளை பார்வையிட்டு வருகிறேன். மயிலாடுதுறை பகுதியில் நெற்பயிர், வாழை உள்ளிட்ட பயிர்கள் சேதமடைந்துள்ளன. வடிகால் ஆறான அய்யாவையனாற்றின் கொள்ளளவு 400 கன அடி அளவே ஆகும். ஆனால் 3 ஆயிரம் கன அடி தண்ணீர் செல்கிறது. இதனால் ஆற்றுநீர் வழிந்து வீடுகளையும், நெற்பயிரையும் சூழ்ந்திருக்கின்றன. பாதிக்கப்பட்ட மக்களை முகாம்களில் தங்க வைத்து தேவையான அளவு உணவு வழங்கி பாதுகாத்து வருகிறோம். பாதிக்கப்பட்ட விவசாயிகளுக்கும், பாதிக்கப்பட்ட மக்களுக்கும் உரிய இழப்பீட்டை நிச்சயம் பெற்றுத்தருவோம்.

உலக அளவில் கொரோனா 2-வது அலையின் தாக்கம் பரவிய போதும், தமிழகத்தில் மிக குறைவாகவே தொற்று பரவியது. இதற்கு பொதுமக்களின் ஒத்துழைப்பும், மருத்துவர்களின் அர்ப்பணிப்பும், சுகாதார துறையின் துரித நடவடிக்கையே காரணம் ஆகும்.

இவ்வாறு அவர் கூறினார்.