ரங்கசாமியிடம் மழை நிவாரணம் கேட்ட காரைக்கால் பிரமுகர்

புதுவையில் கடந்த சில நாட்களுக்கு முன்பு தொடர் மழை பெய்தது. இதனை தொடர்ந்து மழை நிவாரணமாக அனைத்து ரேஷன்கார்டுகளுக்கும் ரூ.5 ஆயிரம் வழங்கப்படும் என்று முதல்-அமைச்சர் ரங்கசாமி அறிவித்தார். ஆனால் அந்த பணம் இன்னும் வழங்கப்படவில்லை. இதற்கிடையே கடந்த 11-ந் தேதி போக்குவரத்து துறை அலுவலகத்தில் நடைபெற்ற விழாவில் கலந்து கொண்டு பேசிய முதல்-அமைச்சர் ரங்கசாமி, அடுத்த வாரம் மழை நிவாரணம் வழங்கப்படும் என்று கூறினார்.

இந்த நிலையில் முதல்-அமைச்சர் ரங்கசாமியின் செல்போன் எண்ணுக்கு ஒருவர் தொடர்பு கொண்டு பேசினார். அப்போது அவர், நான் காரைக்காலில் இருந்து பேசுகிறேன். மழை நிவாரணம் ரூ.5 ஆயிரம் வழங்கப்படும் என்று அறிவித்துள்ளீர்கள், இன்னும் வரவில்லை என்று கூறினார். அதற்கு முதல்-அமைச்சர் ரங்கசாமி, நான் மட்டும் ராஜா இல்லை. எனக்கு கீழே அமைச்சர்கள் உள்ளனர். மேலே உள்ளனர். இது புதுச்சேரி, அப்படி தான் இருக்கும் என்று பதில் அளித்தார். இந்த ஆடியோ தற்போது சமூக வலைத் தளத்தில் வைரலாக பரவி வருகிறது.