ஆருத்ரா தரிசன விழா: சிதம்பரம் நடராஜர் கோவிலில் தேரோட்டம் ஆயிரக்கணக்கான பக்தர்கள் வடம் பிடித்தனர்

சிதம்பரம்,

கடலூர் மாவட்டம் சிதம்பரத்தில் உலக புகழ்பெற்ற நடராஜர் கோவில் உள்ளது. பஞ்ச பூத தலங்களில் ஆகாய ஸ்தலமாக போற்றப்படும் இக்கோவிலில் ஆனி மாதம் நடைபெறும் ஆனி திருமஞ்சனமும், மார்கழி மாதம் நடக்கும் ஆருத்ரா தரிசன விழாவும் சிறப்பு வாய்ந்தது.

இந்த ஆண்டுக்கான ஆருத்ரா தரிசன விழா சிதம்பரம் நடராஜர் கோவிலில் கடந்த 11-ந்தேதி கொடியேற்றத்துடன் தொடங்கியது.

போராட்டத்திற்கு பின் அனுமதி

விழாவின் முக்கிய நிகழ்ச்சிகளில் ஒன்றான தேரோட்டத்தை நேற்று நடத்துவதற்கான ஏற்பாடுகளை பொதுதீட்சிதர்கள் செய்திருந்தனர். ஆனால் கொரோனா தடுப்பு நடவடிக்கையாக நடராஜர் கோவிலில் தேரோட்டம் நடத்தவும், ஆருத்ரா தரிசனத்தில் பக்தர்கள் பங்கேற்கவும் மாவட்ட நிர்வாகம் தடை விதித்திருந்தது. இதற்கு எதிர்ப்பு தெரிவித்து பா.ஜ.க., இந்து முன்னணி, ஆலய பாதுகாப்பு குழுவினர், சிவனடியார்கள் நேற்று முன்தினம் இரவு சாலை மறியல் போராட்டத்தில் ஈடுபட்டனர். இதையடுத்து தேரோட்டம் நடத்தவும், ஆருத்ரா தரிசன விழாவில் பக்தர்களுக்கு அனுமதி அளித்தும் மாவட்ட நிர்வாகம் உத்தரவிட்டது.

தேரோட்டம்

இதனை தொடர்ந்து நேற்று காலையில் தேரோட்டம் கோலாகலமாக நடந்தது. இதையொட்டி நடராஜருக்கும், சிவகாமசுந்தரி அம்பாளுக்கும், சிறப்பு அலங்காரங்கள் செய்து, பூஜைகள் நடந்தது. தொடர்ந்து மூலவர் நடராஜர், சிவகாமசுந்தரி அம்பாள் மற்றும் விநாயகர், சுப்பிரமணியர், சண்டிகேஸ்வரர் சாமிகள் காலை 7 மணி அளவில் கீழ வீதியில் அலங்கரித்து வைக்கப்பட்டு இருந்த தனித்தனி தேர்களில் எழுந்தருளினர்.

இதையடுத்து அங்கு திரண்டு நின்ற ஆயிரக்கணக்கான பக்தர்கள் சிவ, சிவா, நடராஜா என்ற பக்தி கோஷங்களை எழுப்பியபடி தேரை வடம் பிடித்து இழுத்தனர். பக்தர்கள் வெள்ளத்தில் 4 வீதிகளில் ஆடி, அசைந்து வந்த தேர்களை கண்டு ஏராளமானோர் கண்டு மனமுறுகி வேண்டினர். தேர் இரவு 8 மணி அளவில் நிலைக்கு வந்தது.

இன்று ஆருத்ரா தரிசனம்

விழாவின் சிகர நிகழ்ச்சியான ஆருத்ரா தரிசனம் இன்று (திங்கட்கிழமை) மாலை 3 மணி அளவில் கோவிலின் ஆயிரங்கால் முகப்பு மண்டபம் முன்பு நடக்கிறது. அப்போது நடராஜர், சிவகாமசுந்தரி அம்பாள் 3 முறை முன்னும், பின்னும் ஆடி பக்தர்களுக்கு தரிசனம் கொடுப்பார்கள்.

தாணுமாலயசாமி கோவில்

கன்னியாகுமரி மாவட்டம் சுசீந்திரம் தாணுமாலயசாமி கோவிலில் மார்கழி திருவிழா நடந்து வருகிறது. இதன் சிகர நிகழ்ச்சியான தேரோட்டம் நேற்று நடந்தது.