சென்னையிலிருந்து குஜராத் செல்லும் 1000 முதலைகள்

சென்னையை அடுத்த வடநெம்மேலி கிழக்கு கடற்கரை சாலையில் உள்ள முதலை பண்ணையில் 17 வகைகளை சேர்ந்த 2 ஆயிரத்துக்கும் மேற்பட்ட முதலைகள் கடந்த பல ஆண்டுகளாக பராமரிக்கப்பட்டு வருகின்றன. ஆசிய கண்டத்திலேயே அதிக முதலைகள் பராமரிக்கப்படும் முதலை பண்ணையாக இவை திகழ்கிறது. கொரோனா கட்டுப்பாடு, ஊரடங்கு காரணமாக கடந்த 2 ஆண்டுகளாக இந்த முதலை பண்ணை கடும் நிதி நெருக்கடியில் சிக்கி தவித்து வருகிறது. பார்வையாளர் வரத்து குறைந்ததால் வருமானம் இன்றி முதலைகளை பராமரிக்க முடியாமலும், ஊழியர்களுக்கு சம்பளம் வழங்க முடியாமலும் நிர்வாகத்தினர் பரிதவித்து வந்தனர்.

இந்நிலையில் மத்திய உயிரியல் பூங்கா ஆணையத்துக்கு முதலைகளை விலங்குகள் பாதுகாப்பு சட்டத்தின்படி வேறு இடத்துக்கு மாற்றம் செய்ய வேண்டும் என்று முதலை பண்ணை நிர்வாகத்தினர் கோரிக்கை வைத்தனர்.  இதனை ஏற்று மத்திய உயிரியல் பூங்கா ஆணையம் தமிழ்நாடு வனவிலங்கு காப்பகத்துக்கு கடந்த ஆண்டு ஏப்ரல் மாதம் கடிதம் அனுப்பி நிலையில் கரியால் வகை முதலைகள், நன்னீர் முதலைகள், சதுப்பு நில முதலைகள் என பல்வேறு வகைகளை சேர்ந்த 350 ஆண் முதலைகள், 650 பெண் முதலைகள் என மொத்தம் 1,000 முதலைகளை இடமாற்றம் செய்ய அனுமதி அளிக்கப்பட்டது.

அவற்றை குஜராத் மாநிலம் ஜாம்நகரில் உள்ள ரிலையன்ஸ் உயிரியல் பூங்காவுக்கு கொண்டு செல்ல முடிவு செய்யப்பட்டது. அதன்படி கடந்த சில மாதங்களாக முதலை பண்ணையில் இருந்து முதலைகளை பாதுகாப்பாக மரப்பெட்டியில் அடைத்து குஜராத் மாநிலத்துக்கு லாரி மூலம் கொண்டு செல்லப்பட்டு வருகின்றன.