முதல்-அமைச்சர் மருத்துவ காப்பீட்டு திட்டத்தில் புற்றுநோய்க்கு சிகிச்சை - பொது சுகாதாரத்துறை இயக்குனர் தகவல்

சென்னை, 

இதுகுறித்து அவர் நேற்று வெளியிட்ட விழிப்புணர்வு வீடியோவில் கூறியிருப்பதாவது:-

புற்றுநோயினால் பாதிக்கப்பட்டவர்களுக்கு சிகிச்சையை உரிய நேரத்தில் கொடுக்க வேண்டும் என்பதே உலக புற்றுநோய் தினம் 2022-ம் ஆண்டுக்கான நோக்கம் ஆகும். புற்றுநோயால் குணமடைபவர்களின் விகிதம் மேற்கத்திய நாடுகளில் 80 சதவீதமாகவும், இந்தியாவில் 65 சதவீதமாகவும் உள்ளது. இதனை இன்னும் அதிகரிக்க வேண்டும் என்பதே இந்த ஆண்டின் நோக்கமாகும். தமிழகம் உட்பட இந்தியா முழுவதும் பெண்கள் மார்பக புற்றுநோய், கர்ப்பப்பை புற்றுநோயினால் தான் பாதிக்கப்படுகின்றனர்.

அதேபோல், ஆண்களுக்கு வாய் மற்றும் நுரையீரல் புற்றுநோய் தான் அதிகம் இருக்கிறது. 1 லட்சம் மக்களை சோதனை செய்தால் 97 நபர்களுக்கு ஏதாவது ஒரு புற்றுநோய் பாதிப்புள்ளது. 1 ஒரு லட்சம் பேரில் 63 பேர் புற்றுநோயால் இறக்கின்றனர். இதனை கட்டுப்படுத்தாவிட்டால் அதிகரிக்கவும் வாய்ப்புள்ளது. சில சாதாரண அறிகுறிகளை பொதுமக்கள் புரிந்து கொண்டு இந்த அறிகுறிகள் இருக்கும் போது ஆரம்பத்திலே பரிசோதனை செய்து கொள்ள வேண்டும்.

ஆரம்பத்திலேயே புற்றுநோய்க்கு சிகிச்சை பெறுவது நல்லது. தொடர் இருமல், பசியின்மை, மூச்சு விடுவதில் சிரமம், உணவு விழுங்குவதில் சிரமம், மலம் கழிப்பதில் சிக்கல், ரத்தம் கலந்து மலம் செல்வது, அடிக்கடி சிறுநீர் வருதல், சிறுநீர் அவசரமாக வருதல், பாலின உறுப்புகளில் ரத்தம் கசிதல், உடல் எடை வெகுவாக குறைதல், அளவுக்கு அதிகமாக சோர்வு, நிறம் மாறுதல், கட்டிகள் அளவு பெரிதாக்குதல், நீண்ட நாட்களாக உள்ள புண்கள் போன்றவை இருந்தால் அரசு ஆரம்ப சுகாதார நிலையம், அரசு ஆஸ்பத்திரிக்கு சென்றால் உடனடியாக பரிசோதனைகள் செய்து சிகிச்சை பெற வேண்டும்.

பரிசோதனை அனைத்தும் இலவசமாக செய்யப்படுகிறது. முதல்-அமைச்சரின் விரிவான மருத்துவ காப்பீட்டு திட்டத்தின் கீழ் அனைத்தும் இலவசமாக பரிசோதனைகள் செய்து கொள்ளலாம். பரிசோதனையில் புற்றுநோய் உறுதியானால், மருந்து, அறுவை சிகிச்சை, கதிர்வீச்சு சிகிச்சை அளிக்கப்படுகிறது. முதல்-அமைச்சரின் விரிவான மருத்துவ காப்பீட்டு திட்டத்தின் கீழ் தனியார் ஆஸ்பத்திரிகளில் சிகிச்சை பெறலாம்.

மக்களை தேடி மருத்துவம் திட்டத்தின் கீழ் மருந்துகள் வழங்கப்படுகிறது. தேவைப்படுபவர்கள் பயன்படுத்திக் கொள்ளலாம். புற்றுநோய் வராமல் தடுப்பதற்கு ஒரேவழி புகையிலை, மது போன்றவற்றை தவிர்க்க வேண்டும். தினமும் 30 நிமிடம் சாதாரண உடற்பயிற்சி மேற்கொள்ள வேண்டும். ஆண்டுக்கு ஒருமுறை முழு உடல் பரிசோதனை செய்து கொள்ள வேண்டும்.

இவ்வாறு அவர் தெரிவித்தார்.