‘மாநில உரிமைக்கும், தமிழக வளர்ச்சிக்கும் உள்ளாட்சியிலும் தி.மு.க. ஆட்சி தொடரட்டும்' - முதல்-அமைச்சர் வீடியோ பதிவு மூலம் வேண்டுகோள்

சென்னை,

எல்லோரும் நல்லா இருக்கீங்களா?. தி.மு.க. ஆட்சிக்கு வந்து 8 மாதம் ஆகிவிட்டது. தி.மு.க. அரசு அமைந்தால் நாங்கள் என்னவெல்லாம் செய்வோம் என்று சொன்னோமோ, அதில் பெரும்பாலான வாக்குறுதிகளை இந்த 8 மாதத்தில் நிறைவேற்றிவிட்டோம்.

நம்முடைய ஆட்சியை வழிநடத்துவது திராவிட மாடல் சிந்தனை. அதுஎன்ன திராவிட மாடல் சிந்தனை?, அப்படி என்றால் என்ன? என்று கேட்பவர்களுக்கு என்னுடைய பதில், சமூகநீதி சிந்தனையுடன் கூடிய வளர்ச்சி. புரியும் படியாக சொல்ல வேண்டும் என்றால், வாய்ப்புகளும், வளங்களும் தமிழ்நாட்டில் உள்ள எல்லா வரம்பு மக்களுக்கும், எல்லா மாவட்டத்தில் இருக்கும் மக்களுக்கும் சரிசமமாக போய் சேரவேண்டும்.

இதில், எந்த சாதி, மத, வர்க்க, பாலின வேறுபாடும் இருக்கக்கூடாது. ஒரு மாநிலத்தின் வளர்ச்சி என்பது, அங்கு இருக்கின்ற ஒரு சிலருக்கு மட்டும் போய் சேருவதற்கு பதிலாக, அங்கு வாழ்கின்ற எல்லா தரப்பு மக்களின் வாழ்க்கை தரத்தையும் உயர்த்த வேண்டும். அதுதான் உண்மையான வளர்ச்சி. அதுதான் திராவிட சிந்தனை.

நாங்கள் கொண்டுவரும் ஒவ்வொரு திட்டமும், இந்த சிந்தனையின் அடிப்படையில்தான் உருவாக்கப்படுகிறது. ஒரு லிட்டர் பாலுக்கு ரூ.3 விலையை குறைத்தோம். பெண்களின் சமூக உரிமையையும், வாய்ப்புகளையும் அதிகரிக்க பெண்களுக்கு பேருந்தில் இலவச பயணம் என்று திட்டம் கொண்டு வந்தோம்.

தமிழ்நாட்டின் அரசு வேலைகளில் தமிழர்களுக்குத்தான் முன்னுரிமை என்று அரசாணை போட்டதன் மூலமாக நம் இளைஞர்களுக்கான வேலைவாய்ப்பை உறுதி செய்திருக்கிறோம். அனைத்து சாதியினரும் அர்ச்சகராகலாம் திட்டத்தில் அர்ச்சகராக நியமித்தோம். சமூக நீதி என்றால் தமிழ்நாடுதான் என்பதை இந்தியாவுக்கே எடுத்துக்காட்டினோம்.

பட்டியலின மக்களின் கல்விக்கும், முன்னேற்றத்துக்கும் சிறப்பு திட்டங்களை கொண்டுவந்தோம். இல்லம் தேடி கல்வி, இல்லம் தேடி மருத்துவம் என்று மக்களுக்கான திட்டங்களை நடைமுறைப்படுத்தி, அரசாங்கத்தின் அணுகுமுறையில் புதிய மாற்றத்தை கொண்டுவந்துள்ளோம்.

தி.மு.க.வை இந்துக்களுக்கு எதிரான கட்சி என்று காலாகாலமாக சொல்லப்பட்டுவந்த பொய்யை, இன்றைக்கு சுக்குநூறாக உடைத்திருக்கிறோம். உதாரணத்துக்கு இந்த தி.மு.க. ஆட்சியில்தான், ஆக்கிரமிப்பில் இருந்த ரூ.1,789 கோடி மதிப்புள்ள 180 ஏக்கர் கோவில் நிலங்களை மீட்டிருக்கிறோம்.

தேர்தல் அறிக்கையில் சொன்ன மாதிரி, கோவில் சீரமைப்புக்காக ரூ.1,000 கோடி நிதியை ஒதுக்க ஆரம்பித்துள்ளோம். ஆனால், மதத்தை வைத்து அரசியல் பண்ணுகின்றவர்களுக்கு தமிழ்நாட்டை பார்த்தால் பி.பி. (உயர் ரத்த அழுத்தம்) ஏறத்தான் செய்யும். என்னடா, நாங்களும் என்னென்னவோ பண்ணிபார்க்கிறோம், அந்த மக்களின் ஒற்றுமையை ஒன்னுமே பண்ணமுடியவில்லை என்று வெறுப்பு இருக்கத்தான் செய்யும்.

சமூக நீதியையும், சமத்துவத்தையும் நிலைநாட்டுகின்ற, நம்முடைய முயற்சிகளுக்கு எதிராக பலவிதமான சவால்களை முன்வைக்கிறது, நம்முடைய மத்திய அரசு. அதற்கு உதாரணமாக சொல்ல வேண்டும் என்றால், சிக்கலான இந்த கொரோனா சமயத்தில்கூட, நமக்கு வரவேண்டிய ரூ.16,725 கோடி ஜி.எஸ்.டி. நிலுவைத் தொகையை தராமல் இழுத்தடிக்கிறார்கள்.

தேசிய மற்றும் மாநில பேரிடர் நிவாரண நிதியில் இருந்து, நமக்கு வரவேண்டிய கொரோனா நிவாரண நிதியான ரூ.8,989 கோடியும் நமக்கு தரப்படவில்லை. இந்த வருடம் மத்திய பட்ஜெட்டை எடுத்துக்கொள்ளுங்கள், கொரோனாவால் பாதிக்கப்பட்ட மக்களுக்கு எந்த சலுகையும் இல்லை, உதவிகளும் இல்லை.

மேலும், இந்த பட்ஜெட்டில் முக்கியமான முன்னெடுப்பாக, வைரத்துக்கு வரியை குறைத்திருக்கிறார்கள். இதை கேட்டு அழுவதா, சிரிப்பதா என்றே தெரியவில்லை. 100 நாள் வேலை திட்டத்துக்கான நிதியை குறைத்து, அந்த திட்டத்தையே கேள்விக்குறியாக்கிவிட்டார்கள்.

இந்த ஆதிக்க அணுகுமுறையின் நீட்சிதான், ‘நீட்' தேர்வு. நிறைய செலவு செய்து, பயிற்சி வகுப்புக்கு போனவர்களுக்குத்தான் பெரும்பாலும் ‘நீட்' மூலமாக மருத்துவ கல்லூரிகளில் இடம் கிடைக்கிறது. இதனால் வசதியில்லாத, ஏழை மாணவர்களுக்கான வாய்ப்புகள் ரொம்பவும் குறைந்துபோய்விட்டது. இது எவ்வளவு பெரிய சமூக அநீதி. இந்த அநீதியை எதிர்த்துத்தான் நம்முடைய சட்டமன்றத்தில் ‘நீட்' தேர்வு வேண்டாம் என்று சட்ட திருத்தம் செய்தோம்.

அந்த சட்ட முன்வரைவை கவர்னருக்கு அனுப்பிவைத்தால், கவர்னர் அதை நமக்கே திருப்பி அனுப்புகிறார். மக்களால் தேர்ந்தெடுக்கப்பட்ட ஒரு அரசாங்கம் கொண்டுவருகின்ற சட்டத்தை தடுக்க நினைப்பது ஜனநாயக படுகொலைதானே.

ஆனால், முந்தைய ஆட்சி (அ.தி.மு.க.) மாதிரி இல்லாமல், நாம் இந்த அநீதிக்கு எல்லாம் துணைபோக மாட்டோம். ஒருபோதும் நம் உரிமைகளை விட்டுக்கொடுக்க மாட்டோம். ஒவ்வொரு சவாலையும் போராடி வெல்வோம். நாமெல்லாம் ஒன்றாகத்தான் இருக்கிறோம். இனிமேலும் ஒன்றாகத்தான் இருப்போம் என்பதை இந்த உள்ளாட்சி தேர்தலின் முடிவு அவர்களுக்கு காட்டட்டும்.

மாநில உரிமைக்கும், தமிழ்நாட்டின் வளர்ச்சிக்கும் உள்ளாட்சியிலும் நம் ஆட்சி (தி.மு.க.) தொடரட்டும். உதயசூரியனுக்கும், மதச்சார்பற்ற கூட்டணி கட்சிகளின் சின்னங்களுக்கும் வாக்களிக்குமாறு உங்களை உரிமையுடன் கேட்டுக்கொள்கிறேன். என்றென்றும் உங்களுடன்.

இவ்வாறு முதல்-அமைச்சர் மு.க.ஸ்டாலின் பேசியுள்ளார்.