பஸ்ஸில் ஏற முயன்ற பள்ளி மாணவன் தவறி விழுந்து பலி..!

கும்பகோணம் அருகே உள்ள அரிய திடல் , கற்பக மூர்த்தி நகர் பகுதியை சேர்ந்தவர் அமானுல்லா. இவரது மகன் முகமது ஆதில் (வயது 16). கும்பகோணத்தில் உள்ள ஒரு பள்ளியில் பிளஸ் 1 படித்து வந்தான். முகமது ஆதில் தினமும் வீட்டில் இருந்து புறப்பட்டு பஸ்ஸில் ஏறி கும்பகோணத்தில் உள்ள தான் படிக்கும் பள்ளிக்கு செல்வது வழக்கம். 

இந்த நிலையில் இன்று காலை முகமது ஆதில் வழக்கம்போல் தனது வீட்டிலிருந்து பள்ளிக்கு புறப்பட்டு சென்றான். அரிய திடல் பகுதியில் உள்ள பஸ் நிலையத்தில் பஸ்சுக்காக காத்திருந்த ஆதில் அந்த வழியாக வந்த பஸ்ஸில் ஓடிச்சென்று ஏற முயன்ற போது நிலைதடுமாறி கீழே விழுந்தான். இதில் தலை உள்ளிட்ட பல்வேறு இடங்களில் பலத்த காயத்துடன் உயிருக்கு போராடிக் கொண்டிருந்த முகமது ஆதில்லை பஸ் கண்டக்டர் மற்றும் டிரைவர் 2 பேரும் மீட்டு கும்பகோணம் அரசு மருத்துவமனைக்கு அதே பஸ்ஸில் சிகிச்சைக்காக கொண்டு வந்தனர். 

அங்கு மாணவனை பரிசோதனை செய்த டாக்டர்கள் அவர் ஏற்கனவே இறந்துவிட்டதாக தெரிவித்தனர். இதனைத் தொடர்ந்து மாணவனின் பெற்றோருக்கு தகவல் தெரிவிக்கப்பட்டது. மேலும் இந்த சம்பவம் குறித்து பட்டீஸ்வரம் போலீசாருக்கு தகவல் தெரிவிக்கப்பட்டது. 

தகவலறிந்து வந்த போலீசார் மாணவனின் உடலைக் கைப்பற்றி பிரேத பரிசோதனைக்கு அனுப்பி வைத்தனர். மேலும் சம்பவம் குறித்து வழக்கு பதிவு செய்து விசாரணை நடத்தி வருகின்றனர். பள்ளிக்கு புறப்பட்டு வந்த பிளஸ் 1 மாணவன் பஸ் சக்கரங்களில் சிக்கி உயிரிழந்த சம்பவம் கும்பகோணம் பகுதியில்பெரும் சோகத்தை ஏற்படுத்தி உள்ளது.