ரூ.17½ லட்சம் சொத்து வரி நிலுவை: புதுக்கோட்டையில் பி.எஸ்.என்.எல். அலுவலகத்திற்கு ‘சீல்’ நகராட்சி நிர்வாகம் நடவடிக்கை

புதுக்கோட்டை நகராட்சியில் சொத்து வரி, குடிநீர் வரி, நகராட்சிக்கு சொந்தமான கடைகளில் வாடகை உள்பட வரிகள் தொடர்பாக நிலுவை தொகை மொத்தம் ரூ.20 கோடி அளவிற்கு உள்ளது. இந்த தொகையை வசூலிக்க சம்பந்தப்பட்டவர்களுக்கு நோட்டீசு அனுப்பி நகராட்சி அதிகாரிகள் நடவடிக்கை எடுக்கின்றனர். மேலும் வாடகை பாக்கி செலுத்தப்படாத கடைகளுக்கு ‘சீல்’ வைத்து வருகின்றனர். 

புதுக்கோட்டை மேலராஜ வீதி அருகே மத்திய அரசின் பி.எஸ்.என்.எல். நிறுவனத்தின் அலுவலகம் இயங்கி வருகிறது. இந்த கட்டிடத்திற்கு கடந்த 2015-ம் ஆண்டு முதல் 2022-ம் ஆண்டுக்குரியவை வரை செலுத்த வேண்டிய சொத்துவரி ரூ.17 லட்சத்து 50 ஆயிரத்து 644-ஐ நகராட்சிக்கு செலுத்தாமல் நிலுவை வைத்திருந்துள்ளது. இது தொடர்பாக நிலுவை வரி தொகையை செலுத்த கோரி பி.எஸ்.என்.எல். அலுவலகத்திற்கு நகராட்சி ஆணையர் நாகராஜன் கடிதம் அனுப்பி உள்ளார்.

இந்த நிலையில் கடிதம் அனுப்பிய பின்பும் செலுத்தப்படாததால் தங்களது அலுவலகத்தை ஜப்தி செய்ய நேரிடும் என எச்சரிக்கை நோட்டீசும் விடப்பட்டுள்ளது. அதன்பின்பும் பி.எஸ்.என்.எல். நிர்வாகம் சொத்துவரி செலுத்தவில்லை என கூறப்படுகிறது. இந்த நிலையில் புதுக்கோட்டை நகராட்சி வருவாய் ஆய்வாளர் விஜயஸ்ரீ தலைமையில் அதிகாரிகள், நகராட்சி ஊழியர்கள் இன்று பி.எஸ்.என்.எல். அலுவலகத்திற்கு சென்றனர். அங்குள்ள அதிகாரிகளிடம் அலுவலகத்தை ‘சீல்’ வைப்பதாக கூறினர். அப்போது அவர்களுக்குள் வாக்குவாதம் ஏற்பட்டது. இதற்கிடையில் அலுவலகத்தில் உள்ள தொலைதொடர்பு புகார் மையம் அறையை பூட்டி நகராட்சி அதிகாரிகள் ‘சீல்’ வைத்தனர். மேலும் வளாகத்தில் இருந்த கேபிள் வயர்கள், குழாய்களை பறிமுதல் செய்து லாரிகளில் நகராட்சி அலுவலகம் கொண்டு சென்றனர்.

சொத்து வரி செலுத்தாத பி.எஸ்.என்.எல். அலுவலகத்திற்கு ‘சீல்’ வைக்கப்பட்டது பெரும் பரபரப்பை ஏற்படுத்தியது. இது தொடர்பாக பி.எஸ்.என்.எல். நிறுவன உயர்அதிகாரிகளுக்கு புதுக்கோட்டை அதிகாரிகள் தகவல் தெரிவித்தனர். 

‘சீல்’ வைக்கப்பட்டது தொடர்பாக வருவாய் ஆய்வாளர் கூறுகையில், ‘‘ அரசு அலுவலகமாக இருந்தாலும் நகராட்சிக்கு சொத்து வரி செலுத்த வேண்டும். நகராட்சிக்கு செலுத்த வேண்டிய வரிகள் நிலுவையில் வைத்திருப்பவர்கள் மீது நடவடிக்கை எடுக்கப்பட்டு வருகிறது. பல நிறுவனங்களுக்கு எச்சரிக்கை நோட்டீசும் விடப்பட்டுள்ளது. தொடர்ந்து நடவடிக்கை எடுக்கப்படும்’’ என்றார்.