மாம்பலம்: ரெயில் மோதி புகைப்பட கலைஞர் பலி - தண்டவாளத்தை கடந்தபோது விபரீதம்

சென்னை மாம்பலம் தனகோடி அம்மன் பகுதியை சேர்ந்தவர் அய்யனார் (வயது 40). இவர் புகைப்பட கலைஞராக வேலைப்பார்த்து வந்தார். இந்தநிலையில் இன்று காலை தனது நண்பரை பார்ப்பதற்காக மாம்பலம் ரெயில் நிலையம் அருகே தண்டாவாளத்தை கடக்க முயன்றார். அப்போது எதிர்பாராத விதமாக அந்த வழியாக அதிவேகமாக வந்த எக்ஸ்பிரஸ் ரெயில் அவர் மீது மோதியது.

இதில் தூக்கிவீசப்பட்ட அய்யனாரின் உடல் நசுங்கி சம்பவ இடத்திலேயே பரிதாபமாக உயிரிழந்தார். இதையடுத்து அங்கிருந்தவர்கள் கொடுத்த தகவலின்படி விரைந்து வந்த மாம்பலம் ரெயில்வே போலீசார் அய்யனாரின் உடலை மீட்டு ராஜீவ்காந்தி அரசு ஆஸ்பத்திரிக்கு அனுப்பி வைத்தனர். இந்த சம்பவம் தொடர்பாக ரெயில்வே போலீசார் வழக்குப்பதிவு செய்து விசாரணை நடத்தி வருகின்றனர்.