கள்ளநோட்டு புழக்கத்தில் விட்ட வழக்கு ஊட்டி அச்சக உரிமையாளர் கைது

புதுச்சேரி

புதுச்சேரியில் 500 ரூபாய் கள்ள நோட்டை புழக்கத்தில் விட்ட வழக்கில் ஊட்டியை சேர்ந்த அச்சக உரிமையாளரை போலீசார் கைது செய்தனர்.

புதுவையில் 500 ரூபாய் கள்ள நோட்டுகளை புழக்கத்தில் விட்டதாக ஈஸ்வரன் கோவில் தெருவை சேர்ந்த என்.ஆர்.காங்கிரஸ் பிரமுகர் மோகன் கமல் என்பவரை உருளையன்பேட்டை போலீசார் கைது செய்தனர். அவரிடம் போலீசார் நடத்திய விசாரணையில் சென்னை கும்பலிடம் இருந்து 500 ரூபாய் கள்ள நோட்டுகளை வாங்கி வந்து புதுவையில் புழக்கத்தில் விட்டது தெரியவந்தது. இந்த வழக்கில் சென்னை எண்ணூர் பிரதீப்குமார், ரகு (வயது 30), ராயபுரம் நாகூர் மீரான் (30), தமீன் அன்சாரி (28), பழைய வண்ணாரபேட்டை சரண்ராஜ் (30) உள்பட 9 பேரை போலீசார் கைது செய்து சிறையில் அடைத்தனர்.

இந்த வழக்கு தொடர்பாக சமீபத்தில் புதுவைக்கு வந்த தேசிய புலனாய்வு பிரிவை சேர்ந்த அதிகாரிகள் விசாரணை நடத்தினர். 

இந்த வழக்கு தொடர்பாக ரகு, நாகூர் மீரான், தமீன் அன்சாரி, சரண்ராஜ் ஆகிய 4 பேரையும் உருளையன்பேட்டை போலீசார் காவலில் எடுத்து விசாரணை நடத்தினர். விசாரணையில், ஊட்டி எஸ்.பி.ஐ. காலனியை சேர்ந்த அச்சக உரிமையாளர் தாமஸ் (39) என்பவர் கள்ளநோட்டு அச்சடிக்க தேவையான உபகரணங்களை வாங்க உதவியதாக தெரிவித்தனர்.

அதைத்தொடர்ந்து உருளையன்பேட்டை போலீசார் ஊட்டிக்கு சென்று தாமசை கைது செய்தனர். பின்னர் அவரை புதுவை அழைத்து வந்து, நீதிமன்றத்தில் ஆஜர்படுத்தி காலாப்பட்டு சிறையில் அடைத்தனர். இதற்கிடையில் இந்த வழக்கை சி.பி.சி.ஐ.டி. போலீசுக்கு மாற்றி போலீஸ் டி.ஜி.பி. ரன்வீர் சிங் கிறிஷ்ணியா உத்தரவிட்டுள்ளார்.