இலங்கையைபோல் பொருளாதார நெருக்கடியை இந்தியா சந்திக்கும் கே.பாலகிருஷ்ணன் பேட்டி

சென்னை,

பெட்ரோல்-டீசல் விலை ஏற்றத்தை கண்டித்தும், அதை குறைக்க வலியுறுத்தியும் தமிழகம் முழுவதும் நேற்று மார்க்சிஸ்ட் கம்யூனிஸ்டு கட்சி சார்பில் ஆர்ப்பாட்டங்கள் நடத்தப்பட்டது. சென்னை பாரிமுனை குறளகம் அருகே நடைபெற்ற போராட்டத்தில் அக்கட்சியின் மாநில செயலாளர் கே.பாலகிருஷ்ணன் தலைமை தாங்கினார்.

இந்த ஆர்ப்பாட்டத்தில் பொதுமக்களின் உணவு பொருட்கள் விலை ஏறி வரும் சூழலில், பெரும் முதலாளிகளின் நிறுவனங்களுக்கு மட்டும் பல கோடிகள் வாராக்கடனை மத்திய அரசு தள்ளுபடி செய்துள்ளதாக கூறி அதை கண்டித்து முழக்கங்கள் எழுப்பினர். இந்த ஆர்ப்பாட்டத்தை தொடர்ந்து கே.பாலகிருஷ்ணன் நிருபர்களிடம் கூறியதாவது:-

இலங்கையை போல்...

பெட்ரோல், டீசல் மற்றும் கியாஸ் விலை தொடர்ந்து உயர்ந்து வருகிறது. நடந்து முடிந்த 5 மாநில தேர்தல்களுக்கு பின்னர் தான் பெட்ரோல்-டீசல் விலை தினமும் உயர்ந்து வருகிறது. பெட்ரோல்-டீசல் விலை தொடர்ந்து அதிகரித்து வருவதாலும், கியாஸ் விலையும் அதிகரித்து வருவதாலும் சாதாரண மக்களுக்கு கிடைக்கும் உணவு பொருட்களின் விலையும் உயரும் சூழல் ஏற்பட்டுள்ளது.

இந்தியாவின் பொருளாதார வளர்ச்சி தற்போது சீராக இல்லை. இந்த நிலையில் பெரும் நிறுவனங்களின் வாராக்கடன்களை மத்திய அரசு தள்ளுபடி செய்து வருகிறது. அனைத்து விலைவாசிகளும் இந்தியாவில் தற்போது உயர்ந்து வருகிறது. இந்த நிலை தொடர்ந்தால் இலங்கை அரசு தற்போது சந்தித்திருக்கும் பொருளாதார நெருக்கடிபோல் இந்தியாவும் சந்திக்கும் அபாயம் ஏற்படும். இந்த பிரச்சினையை எதிர்கொள்ள வரும் 2024 நாடாளுமன்ற தேர்தலில் மதசார்பற்ற அனைத்து கட்சிகளும் ஒருங்கிணைய வேண்டியது அவசியம்.

இவ்வாறு அவர் கூறினார்.