<
நெல் கொள்முதல் செய்ய வேளாண்மை துறை அலுவலர்களிடம் சான்று பெற வேண்டும்
சம்பா பருவத்திற்கான நேரடி நெல்கொள்முதல் மையங்களில் நெல் கொள்முதல் செய்ய வேளாண்மை துறை அலுவலர்களிடம் மகசூல் சான்று பெற வேண்டும் என்று திருவண்ணாமலை மாவட்ட கலெக்டர் முருகேஷ் தெரிவித்து உள்ளார்.
திருவண்ணாமலை,
சம்பா பருவத்திற்கான நேரடி நெல்கொள்முதல் மையங்களில் நெல் கொள்முதல் செய்ய வேளாண்மை துறை அலுவலர்களிடம் மகசூல் சான்று பெற வேண்டும் என்று திருவண்ணாமலை மாவட்ட கலெக்டர் முருகேஷ் தெரிவித்து உள்ளார்.
இது குறித்து அவர் வெளியிட்டு உள்ள செய்திக்குறிப்பில் கூறியிருப்பதாவது:-
நேரடி நெல் கொள்முதல் மையங்கள்
விவசாயிகள் நேரடி நெல் கொள்முதல் மையங்களில் நெல் விற்பனை செய்ய ஏதுவாக ஏற்கனவே பயன்பாட்டில் உள்ள e-DPC இணையத்தில் சம்பா கொள்முதல் பருவம் 2022-ல் விவசாயிகள் தங்களது பெயர், ஆதார் எண், புல எண், வங்கிக்கணக்கு எண் உள்ளிட்ட விவரங்களை www.tncsc.tn.gov.in அல்லது www.tncsc-edpc.in இணையதளத்தில் பதிவேற்றம் செய்ய வேண்டும்.
மேற்கண்ட இணையதளத்தின் மூலம் திருவண்ணாமலை மாவட்டத்தில் சம்பா பருவம் 2022-க்கு 62 இடங்களில் நேரடி நெல் கொள்முதல் மையங்கள் செயல்படுத்தப்பட்டு வருகின்றது. விவசாயிகள், இணைய வழி பதிவு முறையின் மூலம் பதிவு செய்து தாங்கள் இருக்கும் கிராமங்களின் அருகாமையில் உள்ள நேரடி நெல்கொள்முதல் மையங்களை தாங்களே தேர்வு செய்து நெல் கொள்முதலுக்கு தேவையான வருவாய் ஆவணங்களான பட்டா, சிட்டா மற்றும் அடங்கல் ஆகியவற்றை இணையத்தில் பதிவேற்றம் செய்ய வேண்டும்.
அவ்வாறு பதிவு செய்யப்பட்ட விவசாயிகளின் செல்போன் எண்ணுக்கு குறுஞ்செய்தி மூலம் நேரடி நெல் கொள்முதல் மையத்தின் பெயர், நெல் விற்பனை செய்யப்படும் நாள் மற்றும் நேரம் ஆகிய விவரங்கள் அனுப்பப்படும்.
மகசூல் சான்று
விவசாயிகள் தங்களது செல்போன் எண்ணில் பெறப்பட்ட குறுஞ்செய்தியின் அடிப்படையில் நீண்ட நேரம் காத்திருக்காமல் குறித்த காலத்தில் நேரடி நெல் கொள் முதல் மையத்தில் தாங்கள் விளைவித்த நெல்லை விற்பனை செய்து பயன் பெற்று வருகின்றனர்.
நெல்கொள் முதல் மையங்களில் விவசாயிகள் அல்லாத நபர்கள், வியாபாரிகள் மற்றும் இடைத்தரகர்கள் செயல்பாட்டினை தவிர்க்கும் வகையில் தற்போது விவசாயிகள் கிராம நிர்வாக அலுவலரிடம் அடங்கல் சான்றினை பெற்று அதில் வேளாண்மைத் துறை அலுவலர்களிடம் மகசூல் சான்று (நெல்லின் அளவு கிலோ கிராமில்) அடங்கலில் பெற்ற பின்பே நெல் கொள்முதலுக்கு ஒப்புதல் வழங்க வேண்டும்.
எனவே விவசாயிகள் மகசூல் சான்றினை சம்பந்தப்பட்ட வேளாண்மைத்துறை அலுவலரிடம் பெற்று நெல் கொள்முதல் ஒப்புதலுக்கு சம்பந்தப்பட்ட கிராம நிர்வாக அலுவலரை தொடர்பு கொள்ள வேண்டும்.
இப்புதிய பதிவு திட்டத்திற்கு அனைத்து விவசாயிகளும் ஒத்துழைப்பு வழங்கிட வேண்டும். இது குறித்த கூடுதல் விவரங்களுக்கு தமிழ்நாடு நுகர்பொருள் வாணிபக்கழகம் திருவண்ணாமலை மண்டல மேலாளரை தொடர்பு கொள்ளலாம்.
இவ்வாறு அதில் கூறப்பட்டு உள்ளது.
Related Tags :
Next Story
"Daily Thanthi" a prestigious product from The Thanthi Trust
எங்களைப்பற்றி தனித்தன்மை பாதுகாப்பு தொடர்புகொள்ள வலைத்தள தொகுப்பு ஆலோசனைகள் வேலைவாய்ப்பு
Paper Ad Tariff Web Ad Tariff Terms & Conditions (E-paper)
காப்புரிமை 2024, © The Thanthi Trust Powered by Hocalwire
