<
அரியலூர்: சிங்கராயபுரத்தில் ஜல்லிக்கட்டு போட்டி - 650 காளைகள் பங்கேற்பு...!
சிங்கராயபுரத்தில் நடைபெற்ற ஜல்லிக்கட்டு போட்டியில் 650 காளைகள் பங்கேற்றது.
உடையார்பாளையம்,
அரியலூர் மாவட்டம் உடையார்பாளையம் அருகே உள்ள சிங்கராயபுரம் கிராமத்தில் புனித அந்தோனியார் பொங்கலை முன்னிட்டு ஜல்லிக்கட்டு போட்டி இன்று நடைபெற்றது.
இப்போட்டியில் மதுரை, தஞ்சாவூர்,கரூர், கடலூர், திருவாரூர், திருச்சி, பெரம்பலூர், சேலம், புதுக்கோட்டை, கரூர் உள்ளிட்ட பல்வேறு மாவட்டங்களில் இருந்து 650 காளைகளும் 300 மாடுபிடி வீரர்களும் கலந்து கொண்டு சீறிப்பாய்ந்த காளைகளை அடக்கினர்.
இதில் காளைகளை அடக்கிய வீரர்களுக்கும், பிடிபடாத காளைகளுக்கும் தங்கம் மற்றும் வெள்ளி நாணயங்கள், சில்வர் அண்டா, கட்டில், மின்விசிறி என பல்வேறு பரிசுப் பொருட்கள் வழங்கப்பட்டது.
அரசு அனுமதியுடன் நடைபெறும் இந்த ஜல்லிக்கட்டு போட்டியை உடையார்பாளையம் கோட்டாட்சியர் பரிமளம் தொடங்கி வைத்தார். ஜெயங்கொண்டம் டி.எஸ்.பி கலைக்கதிரவன் தலைமையிலான நூற்றுக்கும் மேற்பட்ட போலீசார் பாதுகாப்பு பணியில் ஈடுபட்டு இருந்தனர்.
போட்டியில் காயமடைந்தவர்களுக்கு முன்னெச்சரிக்கை நடவடிக்கையாக மருத்துவ முகாம்கள் அமைக்கப்பட்டு சிகிச்சை அளிக்கப்பட்டது. முன்னதாக போட்டியில் கலந்துகொள்ளும் வீரர்கள் மற்றும் காளைகளுக்கு மருத்துவ பரிசோதனை செய்த பிறகே போட்டியில் அனுமதிக்கப்பட்டனர் என்பது குறிப்பிடத்தக்கது.
இப்போட்டியை காண்பதற்காக சிங்கராயபுரம் சுற்றுவட்டார பகுதிகளில் இருந்து சுமார் 5 ஆயிரத்திற்கும் மேற்பட்ட பார்வையாளர்கள் வந்திருந்தனர். போட்டிக்கான ஏற்பாட்டினை புனித அந்தோனியார் ஆலய ஜல்லிக்கட்டு விழா கமிட்டி குழுவினர் செய்து இருந்தனர்.
Related Tags :
Next Story
"Daily Thanthi" a prestigious product from The Thanthi Trust
எங்களைப்பற்றி தனித்தன்மை பாதுகாப்பு தொடர்புகொள்ள வலைத்தள தொகுப்பு ஆலோசனைகள் வேலைவாய்ப்பு
Paper Ad Tariff Web Ad Tariff Terms & Conditions (E-paper)
காப்புரிமை 2024, © The Thanthi Trust Powered by Hocalwire
