தி.மு.க. ஆட்சி பொறுப்பேற்ற 11 மாதங்களில் 11 லட்சம் ரேஷன் கார்டுகள் வழங்கப்பட்டுள்ளன

காஞ்சீபுரம்,

காஞ்சீபுரம் மாவட்டத்தில் உணவு மற்றும் உணவுப்பொருள் வழங்கல் துறை அமைச்சர் சக்கரபாணி திடீர் ஆய்வு மேற்கொண்டார்.

அப்போது சிறுகாவேரிப்பாக்கம் ரேஷன் கடை, தமிழ்நாடு அரசு நுகர்பொருள் வாணிப கழக சேமிப்பு கிடங்கு, கீழம்பி ரேஷன் கடை, தாமல் மற்றும் விஷார் நெல் கொள்முதல் நிலையங்களை அவர் நேரில் சென்று ஆய்வு மேற்கொண்டார்.

பின்னர் அமைச்சர் சக்கரபாணி நிருபர்களிடம் கூறியதாவது:-

ஆய்வு குழு

மாநிலம் முழுவதும் ரேஷன் கடைகளில் காலியாக உள்ள 4 ஆயிரம் காலிப்பணியிடங்களை நிரப்ப நடவடிக்கை எடுக்கப்பட்டு வருகிறது. வாலாஜாபாத் வட்டத்தில் பணியிடை நீக்கம் செய்யப்பட்ட 10 பேர் மீண்டும் பணி அமர்த்தப்படுவார்கள். தரமான பொருட்கள் ரேஷன் கடைகளுக்கு அனுப்பப்படுவதை ஆய்வு செய்ய கூட்டுறவுத்துறை இணைப்பதிவாளர், நுகர்பொருள் வாணிப கழக மண்டல மேலாளர், மாவட்ட வழங்கல் அலுவலர், உணவுப்பொருள் கடத்தல் தடுப்பு பிரிவு காவல் அலுவலர் ஆகியோரை கொண்ட ஆய்வு குழு ஒன்று அமைக்கப்பட்டு இக்குழுவினர் ஆய்வு செய்த பின்னர் ரேஷன் கடைகளுக்கு பொருட்கள் அனுப்பப்படும்.

மாவட்ட வழங்கல் அலுவலர் தலைமையில் நுகர்பொருள் வாணிப கழகத்திற்கு அனுப்பப்படும் அரிசி தரமானதாக இருக்க வேண்டும் என அறிவுறுத்தினார்கள். தரமான அரிசியை ரேஷன் கடைகளுக்கு அனுப்பும் பணியை மாவட்ட வழங்கல் அலுவலர் முழு பொறுப்பாக இருந்து செயல்படுத்த வேண்டும்.

11 லட்சம் ரேஷன் கார்டுகள்

286 தமிழ்நாடு நுகர்பொருள் வாணிப கிடங்குகள் ரூ.96 கோடி செலவில் புனரமைப்பு செய்யப்படும். 800 முதல் 3 ஆயிரம் ரேஷன் கார்டுகள் கொண்ட கடைகளை பிரித்து புதிய கடைகள் உருவாக்கப்படும்.

தி.மு.க. தலைமையிலான ஆட்சி பொறுப்பேற்ற 11 மாதங்களில் 11 லட்சம் புதிய ரேஷன் கார்டுகள் வழங்கப்பட்டுள்ளன. நெல் கொள்முதல் நிலையங்கள் மூலம் 31 லட்சம் டன் நெல் கொள்முதல் செய்யப்பட்டுள்ளது.

இவ்வாறு அவர் தெரிவித்தார்.

கலெக்டர் ஆர்த்தி

ஆய்வின்போது உணவுத்துறை வழங்கல் மற்றும் நுகர்வோர் ஆணையாளர் ராஜாராமன், மாவட்ட கலெக்டர் டாக்டர் மா.ஆர்த்தி, தமிழ்நாடு நுகர்பொருள் வாணிப கழக நிர்வாக இயக்குநர் டாக்டர் எஸ்.பிரபாகர், உத்திரமேரூர் எம்.எல்.ஏ. க.சுந்தர், காஞ்சீபுரம் எம்.பி. க.செல்வம், மாவட்ட கூட்டுறவு இணைப்பதிவாளர் லட்சுமி உள்ளிட்டோர் உடன் இருந்தனர்.