அறந்தாங்கி: பிரியாணி சாப்பிட்ட மேலும் 13 பேருக்கு உடல்நலக்குறைவு - மருத்துவமனையில் அனுமதி

அறந்தாங்கி,

புதுக்கோட்டை மாவட்டம், அறந்தாங்கி செந்தமிழ் நகரை சேர்ந்தவர் சித்திரைவேலு. இவர் புதிதாக வீடு கட்டி வருகிறார். இந்த கட்டிட வேலைக்கு நேற்று முன்தினம் 40 தொழிலாளர்கள் வந்து உள்ளனர். இவர்கள் சாப்பிடுவதற்காக அங்காளம்மன் கோவில் தெருவை சேர்ந்த வினோத் (வயது 42) என்பவர் அறந்தாங்கி-புதுக்கோட்டை சாலையில் உள்ள பிரியாணி கடையில் 40 பிரியாணி பார்சல்களை வாங்கி வந்தார். பின்னர் சித்திரைவேலு 40 பேருக்கும் பிரியாணி பார்சல்களை வழங்கினார். 

இதனை அனைவரும் வேலை முடிந்து வீட்டிற்கு பிரியாணி பார்சல்களை கொண்டு சென்று வீட்டில் உள்ளவர்களுடன் சேர்ந்து சாப்பிட்டு உள்ளனர். இந்நிலையில் நேற்று காலை பிரியாணி சாப்பிட்ட 27 பேருக்கு வாந்தி-மயக்கம் ஏற்பட்டது.

இதையடுத்து வாந்தி-மயக்கம் ஏற்பட்ட 27 பேரும் அறந்தாங்கி அரசு மருத்துவமனையில் சிகிச்சைக்காக அனுமதிக்கப்பட்டனர். அங்கு அவர்களுக்கு தீவிர சிகிச்சை அளிக்கப்பட்டு வருகிறது.

பிரியாணி சாப்பிட்டு வாந்தி-மயக்கம் ஏற்பட காரணமாக இருந்த பிரியாணி கடைக்கு உணவு பாதுகாப்பு துறை அலுவலர் ஜேம்ஸ் மற்றும் அதிகாரிகள் அறந்தாங்கி போலீசார் முன்னிலையில்  `சீல்' வைத்தார். இந்த சம்பவம் குறித்து அறந்தாங்கி போலீசார் விசாரணை நடத்தி வருகின்றனர்.