செயற்கைக்கோள்களின் துணையில்லாமல் மனிதனால் அரை மணி நேரம் கூட வாழ முடியாது - இஸ்ரோ முன்னாள் தலைவர் சிவன் பேச்சு...!

கிள்ளியூர், 

குமரி மாவட்டம் கூட்டாலுமூடு பத்ரேஸ்வரி அம்மன் கோவில் சித்திரை திருவிழா கடந்த 1-ஆம் தேதி தொடங்கியது. ஆறாம் திருவிழாவை முன்னிட்டு நேற்று இரவு சமய மாநாடு நடந்தது.  இந்த  நிகழ்வில் இஸ்ரோ முன்னாள் தலைவர் சிவன் குத்துவிளக்கேற்றி துவக்கி வைத்தார்.

அப்போது அவர் பேசியதாவது,

ஐ.எஸ்.ஆர்.ஓ என்றால்  அனைவருக்கும் ராக்கெட் விடுவது பற்றி தான் தெரியும்.  ஆனால் அதன் பின்னால் இருக்கக்கூடிய பயன்கள் யாருக்கும் தெரியாது. 60 ஆண்டுகளுக்கு முன்பு அமெரிக்கா, ரஷ்யா போன்ற நாடுகள் பிற நாடுகளை அழிக்கக்கூடிய ராக்கெட்டுகளை கண்டுபிடித்தார்கள். ஆனால்  இந்தியாவில் பிறந்த விக்ரம் சாராபாய்  மனிதனுக்கு பயன்படக் கூடிய அளவுக்கு மாற்ற வேண்டும் என சிந்தித்தார்.

இந்தியாவில் உள்ள ஒவ்வொரு தனி மனிதனுடைய வாழ்க்கையை தகவல் தொழில் நுட்பம்  தீர்மானிக்கிறது. அந்த வகையில் செயற்கைக்கோள்களின் துணையில்லாமல் இன்று ஒரு மனிதனால் அரைமணிநேரம் கூட வாழ முடியாது.

செயற்கைக்கோள் வருவதற்கு முன்னால் புயல் இயற்கை சீற்றங்களால் ஆயிரக்கணக்கான  மக்கள் இறப்பது வழக்கம்.  ஆனால் செயற்கைக்கோள் உள்ளே வந்த பின்னர் புயல் வீசுவதற்கு ஒரு வாரம் முன்பே எச்சரிக்கை அறிவிப்பு விடப்படுகின்றது. இதனால் உயிர் பலி எண்ணிக்கை இன்று மிக குறைந்துள்ளது.  

அதேபோல் மீனவர்கள் கடலில் மீன்பிடிக்க அவர்களுக்கு வழங்கியுள்ள சேட்டிலைட் கருவியினால் மீன் எங்கிருக்கிறது என்பதை அவர்களால் கண்டறிய முடியும். மேலும் எல்லை தாண்டி படகுச் என்றால் எச்சரிக்கையும் விடுக்கிறது.   

இப்படி மனிதனின் ஒவ்வொரு நிமிட வாழ்க்கையும் இன்று விண்வெளித்துறை தீர்மானிக்கிறது. இந்தியாவில் இருந்து ஏவப்பட்ட 55 செயற்கைக்கோள்கள் நம்முடைய நாட்டை கண்காணித்துக் கொண்டிருக்கிறது. 

விண்வெளி துறை ஆராய்ச்சியில் மாணவர்கள் ஈடுபட வேண்டும். மாணவர்கள் விரும்பிய பாடங்களைதான்  படிக்க வேண்டும். பெற்றோர்களின்  திணிப்பை ஏற்று  பாடங்களை படிக்க கூடாது.  மாணவர்கள் ஒரு இலக்கை நிர்ணயித்து, அந்த இலக்கை நோக்கி பயணிக்க வேண்டும்.

தன்னம்பிக்கை கடின உழைப்பும் இருந்தால் தான் மாணவ சமூகம் இனி வளர்ச்சி அடைய முடியும். இவ்வாறு அவர் பேசினார்.