10, 12-ம் வகுப்பை தொடர்ந்து பிளஸ்-1 பொதுத்தேர்வு தொடங்கியது

சென்னை,

கொரோனா தொற்று காரணமாக நடப்பு கல்வியாண்டுக்கான பொதுத்தேர்வுகள் சற்று தாமதமாக தொடங்கி நடைபெறுகின்றன. 12-ம் வகுப்பு மாணவர்களுக்கு கடந்த 5-ந் தேதியும், 10-ம் வகுப்பு மாணவர்களுக்கு கடந்த 6-ந் தேதியும் தேர்வு தொடங்கியுள்ளன.

அதனைத் தொடர்ந்து பிளஸ்-1 வகுப்பு மாணவர்களுக்கு நேற்று பொதுத்தேர்வு தொடங்கி இருக்கிறது. தமிழகம் மற்றும் புதுச்சேரியில் 3 ஆயிரத்து 119 தேர்வு மையங்களில் 8 லட்சத்து 85 ஆயிரத்து 53 பேர் தேர்வை எழுதுகின்றனர். இவர்களில் தமிழகத்தில் இருந்து மட்டும் 4 லட்சத்து 26 ஆயிரத்து 917 மாணவர்கள், 4 லட்சத்து 42 ஆயிரத்து 989 மாணவிகள், 2 திருநங்கைகள் என மொத்தம் 8 லட்சத்து 69 ஆயிரத்து 908 பேர் தேர்வை எதிர்கொள்கின்றனர்.

ஆர்வத்துடன் எழுதினர்

பிளஸ்-1 வகுப்புக்கான தமிழ் தேர்வு நேற்று நடந்தது. 10-ம் வகுப்பு பொதுத்தேர்வை போலவே, பிளஸ்-1 பொதுத்தேர்வும் 2 ஆண்டு இடைவெளிக்கு பிறகு மீண்டும் நடக்கிறது. அந்த வகையில் கொரோனா தொற்று பரவத்தொடங்கிய காலத்தில் 9-ம் வகுப்பு படித்தவர்கள், இப்போது பிளஸ்-1 பொதுத்தேர்வை எழுதுகின்றனர்.

10-ம் வகுப்பு பொதுத்தேர்வு எழுதாமலேயே, நேரடியாக பிளஸ்-1 வகுப்பு பொதுத்தேர்வை இந்த மாணவ-மாணவிகள் எதிர்கொள்கின்றனர். இருப்பினும் மாணவ-மாணவிகள் எந்தவித பதற்றமும் இன்றி, ஆர்வத்துடன் தேர்வு எழுதியதை பார்க்க முடிந்தது. தமிழகத்தில் சில இடங்களில் நேற்று காலையில் மழை பெய்த நேரத்திலும், மாணவ-மாணவிகள் தேர்வுக்கு வந்திருந்தனர்.

எளிதாக இருந்தது

நேற்று நடந்த தமிழ் தேர்வை பொறுத்தவரையில், ‘எளிதாக இருந்ததாகவும், ஒரு மதிப்பெண் வினாக்கள் மட்டும் புத்தகத்தின் உள் பகுதியில் இருந்தும், 2, 4 மற்றும் 6 மதிப்பெண் வினாக்கள் ஒவ்வொரு பாடத்தின் பின்பக்கத்தில் இடம்பெற்றிருந்த வினாக்களைத்தான் கேட்டு இருந்ததாகவும்' மாணவ-மாணவிகள் தெரிவித்தனர்.

ஒரு மதிப்பெண் வினாக்கள் புத்தகத்தின் உள்பகுதியில் இருந்து கேட்கப்பட்டதால், சாமர்த்தியமாக படித்தவர்களால் மட்டுமே 100-க்கு 100 மதிப்பெண்ணை பெற முடியும் என்று ஆசிரியர்கள் தரப்பில் கூறப்பட்டது. முதல் நாள் நடந்த பிளஸ்-1 தமிழ் தேர்வில் சேலம், திருச்சியில் ஒழுங்கீனச் செயல்களில் ஈடுபட்ட தலா ஒரு மாணவர்கள் பிடிபட்டு இருப்பதாக அரசு தேர்வுத்துறை தெரிவித்து இருக்கிறது.

இதனைத் தொடர்ந்து நாளை (வியாழக்கிழமை) பிளஸ்-1 மாணவர்களுக்கு ஆங்கில தேர்வு நடைபெற இருக்கிறது.

43 ஆயிரம் பேர் தேர்வு எழுத வரவில்லை

பிளஸ்-1 பொதுத்தேர்வு முதல் நாளில் தமிழ் தேர்வு நடந்த நிலையில், தமிழகம் மற்றும் புதுச்சேரியில் இருந்து 8 லட்சத்து 85 ஆயிரத்து 53 மாணவ-மாணவிகள் தேர்வு எழுத இருந்தனர்.

இவர்களில் 43 ஆயிரத்து 533 மாணவ-மாணவிகள் தேர்வு எழுத வரவில்லை என்று அரசு தேர்வுத்துறை வெளியிட்டு இருக்கிறது. ஏற்கனவே 12-ம் வகுப்பு முதல் நாள் தேர்வில் 32 ஆயிரம் பேரும், 10-ம் வகுப்பு முதல் நாள் தேர்வில் 42 ஆயிரம் பேரும் தேர்வுக்கு வராமல் இருந்தனர்.

தற்போது 11-ம் வகுப்பு முதல் நாள் தேர்வில் 43 ஆயிரத்து 533 பேர் தேர்வு எழுதாதது கல்வியாளர்கள், ஆசிரியர்களை அதிர்ச்சி அடைய செய்திருக்கிறது. என்ன காரணத்துக்காக தேர்வு எழுத மாணவர்கள் வரவில்லை என்பது குறித்து கல்வித்துறை ஆய்வு நடத்த இருப்பதாகவும் தகவல்கள் தெரிவிக்கின்றன.