வாலிபரை தாக்கி கொலை மிரட்டல்

தினத்தந்தி 17 May 2022 11:46 PM IST (Updated: 17 May 2022 11:46 PM IST)

வில்லியனூர் அருகே முன்விரோததால் வாலிபரை தாக்கி கொலை மிரட்டல் விடுத்த 3 பேர் மீது போலீசார் வழக்குப்பதிவு செய்தனா்.

வில்லியனூர் அருகே உள்ள கரிக்கலாம்பாக்கத்தை சேர்ந்தவர் இளையராஜா (வயது 31). இவருக்கும் அதே பகுதியை சேர்ந்த மக்கள் வாழ்வுரிமை இயக்கம் தலைவர் ஜெகநாதன் மகன் வாஞ்சிநாதனுக்கும் கடந்த சில தினங்களுக்கு முன்பு தகராறு ஏற்பட்டது. இதில் இளையராஜா மீது வழக்குப்பதிவு செய்யப்பட்டது.

இந்த நிலையில் இளையராஜா தனது மாமியார் வீடான தண்ணிகுப்பம் கிராமத்துக்கு சென்றார். முன்விரோதம் காரணமாக இளையராஜாவை வாஞ்சிநாதன் மற்றும் அவரது ஆதரவாளர்கள் ரமேஷ், ஜெகன் ஆகியோர் பின் தொடர்ந்து சென்று அவரை தாக்கி, கொலை மிரட்டல் விடுத்தனர். இதில் காயமடைந்த இளையராஜா கரிக்கலாம்பாக்கம் ஆரம்ப சுகாதார நிலையத்தில் சிகிச்சை பெற்றார்.

இது குறித்த புகாரின்பேரில் வாஞ்சிநாதன் உள்பட 3 பேர் மீது கரிக்கலாம்பாக்கம் போலீசார் வழக்குப்பதிவு செய்து விசாரித்து வருகின்றனர்.