வெவ்வேறு விபத்துகளில் 3 பேர் படுகாயம்

சிவகாசி,

சிவகாசியில் வெவ்வேறு விபத்துகளில் 3 பேர் படுகாயம் அடைந்தனர்.

கார் மோதியது

சிவகாசி அருகே உள்ள மீனம்பட்டியை சேர்ந்தவர் கார்த்திக் கண்ணன் (வயது 29). இவர் சம்பவத்தன்று சிவகாசி-சாத்தூர் ரோட்டில் தனது மோட்டார் சைக்கிளில் சென்று கொண்டிருந்தார்.

அப்போது அந்த வழியாக வந்த கார், கார்த்திக் கண்ணன் மீது மோதியது. இதில் அவருக்கு பலத்த காயம் ஏற்பட்டது.

உடனே அருகில் இருந்தவர்கள் அவரை மீட்டு சிவகாசி அரசு ஆஸ்பத்திரியில் சேர்த்தனர்.

மேல் சிகிச்சை

அங்கு முதலுதவி அளிக்கப்பட்டு பின்னர் மேல் சிகிச்சைக்காக விருதுநகர் அரசு ஆஸ்பத்திரியில் அனுமதிக்கப்பட்டுள்ளார். இந்த விபத்து குறித்து சிவகாசி கிழக்கு போலீசார் வழக்குப்பதிவு செய்து விசாரணை நடத்தி வருகின்றனர்.

மூதாட்டி

இதேபோல் ஸ்ரீவில்லிபுத்தூர் ஊரணிப்பட்டி தெருவை சேர்ந்த பழனியம்மாள் (60) என்பவர் சிவகாசி-வெம்பக்கோட்டை ரோட்டில் அய்யனார்காலனி பஸ் நிறுத்தம் அருகில் நடந்து சென்று கொண்டிருந்தார். அப்போது அந்த வழியாக சென்ற மோட்டார் சைக்கிள் பழனியம்மாள் மீது மோதியதாக கூறப்படுகிறது.

இதில் அவர் பலத்த காயம் அடைந்தார்.

இதுகுறித்து அவர் கொடுத்த புகாரின் பேரில் சிவகாசி டவுன் போலீசார் வழக்குபதிவு செய்து விசாரணை நடத்தி வருகிறார்கள்.

மற்றொரு விபத்து

விருதுநகரை சேர்ந்தவர் சரவணன் (42). இவர் சிவகாசியில் உள்ள ஒரு பேட்டரி வாகன விற்பனை நிலையத்தில் வேலை செய்து வருகிறார். இவர் தினமும் தனது பேட்டரி வாகனத்தில் சிவகாசிக்கு வந்து செல்வது வழக்கம்.

சம்பத்தன்று வழக்கம்போல் பேட்டரி வாகனத்தில் விருதுநகர் சென்ற போது திருத்தங்கல்-எஸ்.என்.புரம் ரோட்டில் வந்த மோட்டார் சைக்கிள் மோதி படுகாயம் அடைந்தார்.

அருகில் இருந்தவர்கள் அவரை மீட்டு சிவகாசி அரசு ஆஸ்பத்திரியில் சிகிச்சைக்காக சேர்த்தனர். இந்த விபத்து குறித்து திருத்தங்கல் போலீசார் வழக்குப்பதிவு செய்து விசாரணை நடத்தி வருகின்றனர்.