மின்னல் ரவுடி வேட்டையில் 32 பேர் அதிரடி கைது

வேலூர் மாவட்டத்தில் மின்னல் ரவுடி வேட்டையில் 32 பேர் அதிரடியாக கைது செய்யப்பட்டனர்.

மின்னல் ரவுடி வேட்டை

தமிழகத்தில் கொலை, கொள்ளை, திருட்டு போன்ற குற்ற வழக்குகளில் தொடர்புடையவர்களை பிடிக்க ஆபரேஷன் மின்னல் ரவுடி வேட்டை மேற்கொள்ளப்பட்டது. அதன்படி வேலூர் மாவட்டத்திலும் மாவட்ட சூப்பிரண்டு ராஜேஷ்கண்ணன் உத்தரவின்பேரில் மின்னல் ரவுடி வேட்டை மேற்கொள்ளப்பட்டது.

அந்தந்த உட்கோட்டத்தில் துணை போலீஸ் சூப்பிரண்டுகள் மேற்பார்வையில், இன்ஸ்பெக்டர்கள் தலைமையில் போலீசார் ரோந்து பணியில் ஈடுபட்டனர். இதுதவிர வாகன தணிக்கையும் மேற்கொள்ளப்பட்டது.

32 ரவுடிகள்

இந்த வேட்டையில் பழைய குற்றவாளிகள் பலர் பிடிபட்டனர். அதன்படி வேலூர் உட்கோட்டத்தில் துணை போலீஸ் சூப்பிரண்டு திருநாவுக்கரசு மேற்பார்வையில் 19 குற்றவாளிகள் பிடிபட்டனர். இதில் 2 பேர் ஜெயிலில் அடைக்கப்பட்டனர். மீதம் உள்ள 17 பேரிடம் குற்ற செயல்களில் ஈடுபட மாட்டோம் என எழுதி வாங்கினர். இதேபோல காட்பாடி உட்கோட்டத்தில் 6 பேர் கைது செய்யப்பட்டனர். இதில் 3 பேரை ஜெயிலில் அடைத்தனர். குடியாத்தம் உட்கோட்டத்தில் 7 பேர் கைது செய்யப்பட்டு அவர்களிடம் பிரமாண பத்திரம் எழுதி வாங்கப்பட்டது.

கைது செய்யப்பட்ட 32 பேரில் பெரும்பாலானவர்கள் ரவுடிகளாக வலம் வந்தவர்கள் என்றும், இதேபோன்று வேட்டை இனி அடிக்கடி நடத்தப்படும் என்றும் போலீசார் தெரிவித்தனர்.