10-ம் வகுப்பு தேர்வில் தேர்ச்சி பெற்ற 51 வயது பெண்

கரூர் மாவட்டம், கிருஷ்ணராயபுரம் பகுதியை சேர்ந்தவர் ராஹீலாபானு(வயது 51). இவர் பூவம்பாடி ஊராட்சி ஒன்றிய நடுநிலைப்பள்ளியில் சத்துணவு சமையலராக பணிபுரிந்து வருகிறார். இவர் 1989-ம் ஆண்டு 9-ம் வகுப்பு முடித்துவிட்டு குடும்ப சூழ்நிலை காரணமாக பள்ளி செல்லவில்லை. கடந்த 12 ஆண்டுகளாக சமையலராக பணிபுரிந்து வருகிறார். இந்நிலையில் 10-ம் வகுப்பு தேர்ச்சி பெற்றால்தான் சத்துணவு அமைப்பாளர் பதவிக்கு தகுதி பெற முடியும் என்ற காரணத்தால், 10-ம் வகுப்பு தேர்வு எழுத முடிவு செய்து கடந்த ஏப்ரல் மாதம் நடைபெற்ற 10-ம் வகுப்பு பொதுத்தேர்விற்கு தனிதேர்வராக விண்ணப்பித்து தேர்வு எழுதினார். இதில் ஆங்கிலம் மற்றும் சமூக அறிவியல் ஆகிய பாடங்களில் தேர்ச்சி பெற்றார். பின்னர் தேர்ச்சி பெறாத தமிழ், கணிதம், அறிவியல் ஆகிய பாடங்களுக்கு ஜூன் மாதம் நடைபெற்ற துணைத்தேர்விற்கு விண்ணப்பித்து தேர்வு எழுதினார். இந்நிலையில் நேற்று 10-ம் வகுப்பு துணைத்தேர்வு முடிவுகள் வெளியாகின. இதில் ராஹீலா பானு தேர்வு எழுதிய தமிழ், கணிதம், அறிவியல் ஆகிய பாடங்களில் தேர்ச்சி பெற்றார்.