48 மதுபாட்டில்கள் அடங்கிய பெட்டியை திருடி சென்ற 2 வாலிபர்கள்

மயிலாடுதுறையில் டாஸ்மாக் கடையில் லாரியில் இருந்து இறக்கும்போது 48 மதுபாட்டில்கள் அடங்கிய பெட்டியை திருடி சென்ற 2 வாலிபர்கள் போலீசார் வலைவீசி தேடி வருகின்றனர்.

மதுபாட்டில்கள்

தஞ்சாவூர் மாவட்டம் திருபுவனத்தில் உள்ள தமிழ்நாடு வாணிபக் கழகத்தின் மதுபான மொத்த கிடங்கில் இருந்து மயிலாடுதுறை மாவட்டத்தில் உள்ள அனைத்து அரசு டாஸ்மாக் மதுபானக் கடைகளுக்கு விற்பனைக்காக மதுபாட்டில்கள் லாரிகளில் கொண்டு வருவது வழக்கம். அந்த வகையில் மயிலாடுதுறை மாவட்டம் மகாதானத் தெருவில் உள்ள டாஸ்மாக் மதுபானக் கடைக்கு நேற்றுமுன்தினம் மாலை லாரியில் மதுபாட்டில்கள் வந்து இறங்கியது.

அதனை ஊழியர்கள் டாஸ்மார்க் கடைக்கு எடுத்து சென்று கொண்டிருந்தனர். அப்போது அதனை நோட்டமிட்டு கொண்டிருந்த 2 இளைஞர்கள் லாரியிலிருந்து எடுத்து வைக்கப்பட்ட 48 குவாட்டர் பாட்டில்கள் அடங்கிய ஒரு பெட்டி மதுபாட்டில்களை குண்டுகட்டாக தூக்கிக் கொண்டு கண்ணிமைக்கும் நொடியில் மோட்டார் சைக்கிளில் மின்னல் வேகத்தில் சென்று விட்டனர்.

சி.சி.டி.வி. காட்சி

அவர்களை லாரியில் இருந்த ஊழியர் இறங்கி விரட்டி சென்றும் அந்த இளைஞர்களை பிடிக்க முடியவில்லை. திருடி சென்ற 48 மதுபாட்டில்கள் விலை ரூ. 6 ஆயிரத்து 140 ஆகும். இது குறித்து தகவல் அறிந்த டாஸ்மாக் கடையின் மேற்பார்வையாளர் சுரேந்திரன் மயிலாடுதுறை போலீஸ் நிலையத்தில் புகார் அளித்துள்ளார்.

புகாரின்பேரில் மயிலாடுதுறை போலீசார் கண்காணிப்பு கேமரா பதிவுகளை வைத்து இளைஞர்களை தேடி வருகின்றனர். இளைஞர்கள் மது பாட்டில்களை திருடிச் செல்லும் சி.சி.டி.வி. காட்சி தற்போது சமூக வலைதளங்களில் வேகமாக பரவி வருகிறது. இந்த சம்பவம் மயிலாடுதுறை பகுதியில் பெரும் பரபரப்பை ஏற்படுத்தியுள்ளது.