திண்டிவனம் அருகே மோட்டார் சைக்கிள் மோதி மாற்றுத்திறனாளி சாவு

திண்டிவனம்,

திண்டிவனம் அடுத்த தாதாபுரம் ராஜன் நகரை சேர்ந்தவர் சக்கரவர்த்தி மகன் சுப்பிரமணியன் (வயது 53). மாற்றுத்திறனாளி. இவர் 3 சக்கர வாகனத்தில் டீ வியாபாரம் செய்து வந்தார். நேற்று முன்தினம் மாலை, தாதாபுரத்தில் இருந்து செங்கேணிகுப்பம் பகுதிக்கு சென்று கொண்டிருந்தார். அப்போது, எதிரில் வந்த மோட்டார் சைக்கிள் அவர் மீது மோதியது. இதில் பலத்த காயம் அடைந்த சுப்பிரமணியன் திண்டிவனம் அரசு மருத்துவமனையில் சிகிச்சைக்காக சேர்க்கப்பட்டு, பின்னர் மேல் சிகிச்சைக்காக புதுச்சேரி ஜிப்மர் மருத்துவமனைக்கு அனுப்பி வைக்கப்பட்டார். அங்கு சிகிச்சை பலனின்றி சுப்பிரமணியன் பரிதாபமாக இறந்து போனார். இது குறித்த புகாரின் பேரில் வெள்ளிமேடு பேட்டை போலீசார் வழக்கு பதிவு செய்து விசாரித்து வருகின்றனர்.