முதுமலையில் வளரும் குட்டி யானை பற்றிய ஆவணப்படம்

கூடலூர்,

முதுமலையில் பராமரிக்கப்பட்டு வரும் குட்டி யானை பற்றிய ஆவணப்படம், ஆஸ்கர் விருதுக்கு போட்டியிடுகிறது.

குட்டி யானைகள் பராமரிப்பு

நீலகிரி மாவட்டம் முதுமலை புலிகள் காப்பகத்தில் 28 வளர்ப்பு யானைகள் பராமரிக்கப்பட்டு வருகிறது. காட்டில் தாயை பிரிந்து தவிப்பது மற்றும் ஊருக்குள் புகுந்து அட்டகாசம் செய்யும் காட்டு யானைகளை பிடித்து கும்கியாக மாற்றி வனத்துறையினர் பராமரித்து வருகின்றனர். இதில் தாயை பிரிந்து தவிக்கும் குட்டி யானைகளை வனத்துறையினர் மீட்டு முகாமுக்கு கொண்டு வருகின்றனர்.

தொடர்ந்து பாகன்கள், கால்நடை டாக்டர் கொண்ட மருத்துவ குழு கண்காணிப்பில் குட்டி யானைகள் வளர்க்கப்படுகிறது. இதில் கடந்த 2017-ம் ஆண்டில் ரகு, 2019-ம் ஆண்டில் பொம்மி குட்டி யானைகள் முகாமுக்கு வந்தன. இதை பழங்குடியினத்தை சேர்ந்த பொம்மன், அவரது மனைவி பெள்ளி ஆகியோர் பராமரித்து வந்தனர். இதை மையமாக வைத்து ஊட்டியை சேர்ந்த பெண் இயக்குனர் கடந்த 2019-ம் ஆண்டு தி எலிபெண்ட் விஸ்பர்ஸ் என்ற பெயரில் ஆவணப்படம் ஒன்றை உருவாக்கினார்.

ஆஸ்கர் தேர்வு பட்டியல்

இதனிடையே அடுத்த மாதம் மார்ச் 12-ந் தேதி லாஸ் ஏஞ்சல்ஸ் நகரில் 95-வது ஆஸ்கர் விருது வழங்கும் விழா நடக்கிறது. இதில் 10 பிரிவுகளுக்கான தேர்வு பட்டியலில் தி எலிபெண்ட் விஸ்பர்ஸ் ஆவணப்படம் இடம் பிடித்து உள்ளது. இதனால் முதுமலை பாகன்கள் மத்தியில் மகிழ்ச்சி ஏற்பட்டு உள்ளது.

இதுகுறித்து பொம்மி குட்டி யானையை பராமரித்து வரும் பெள்ளி கூறும்போது, குட்டி யானை வளர்ப்பு குறித்த ஆவணப்படம் உலக அளவிலான தேர்வு பட்டியலில் இடம் பிடித்து உள்ளது மகிழ்ச்சி அளிக்கிறது என்றார்.