இறந்த நிலையில் கரை ஒதுங்கிய ராட்சத ஆமை

கன்னியாகுமரியில் முக்கடலும் சங்கமிக்கும் திரிவேணி சங்கமம் கடற்கரை பகுதியில் ராட்சத ஆமை ஒன்று இறந்த நிலையில் கரை ஒதுங்கியது. இதைகண்ட அந்த பகுதி மக்கள் இதுபற்றி வனத்துறைக்கு தகவல் தெரிவித்தனர். அதன் பேரில் வேட்டை தடுப்பு காவலர் சிவகுமார், வனக்காவலர் ஜோயல் ஆகியோர் தலைமையிலான வனத்துறையினர் சம்பவ இடத்துக்கு விரைந்து வந்தனர். அவர்கள் இறந்த நிலையில் கரை ஒதுங்கிய ராட்சத ஆமையை பார்வையிட்டனர். பின்னர், அந்த ஆமையை மீட்டு பிரேத பரிசோதனைக்காக அனுப்பி வைத்தனர். வனத்துறையினர் கூறுகையில், இறந்து கரை ஒதுங்கிய ஆமை சுமார் 50 கிலோ எடை கொண்டதாக இருந்தது. கப்பலில் அடிபட்டு இறந்து கரை ஒதுங்கி இருக்கலாம் என வனத்துறையினர் தெரிவித்தனர்.