பட்டுக்கூடு கிலோ ரூ.600-க்கு கொள்முதல் செய்ய வேண்டும்

தமிழ்நாடு பட்டுக்கூடு உற்பத்தி விவசாயிகள் நலச்சங்க ஆலோசனை கூட்டம், பழனியை அடுத்த தும்பலப்பட்டியில் நேற்று நடந்தது. கூட்டத்துக்கு மாவட்ட தலைவர் காளிமுத்து தலைமை தாங்கினார். மாநில செயலாளர் பொன்னுசாமி, பொருளாளர் கனகராஜ், ஒருங்கிணைப்பாளர் பி.செல்வராஜ் ஆகியோர் முன்னிலை வகித்தனர். மாநில தலைவர் எம்.செல்வராஜ் சிறப்பு விருந்தினராக கலந்துகொண்டு பேசினார்.

கூட்டத்தில், உற்பத்தி செலவை கருத்தில் கொண்டு பட்டுக்கூடுகளுக்கு குறைந்தபட்ச விலையாக கிலோ ரூ.600-க்கு கொள்முதல் செய்ய வேண்டும், விற்பனை செய்த பட்டுக்கூடுகளுக்கு உடனடி பணப்பட்டுவாடா செய்ய வேண்டும். காப்பீடு திட்டத்தை புதுப்பிக்க வேண்டும். ஆன்லைன் விற்பனை முறையை கொண்டு வர வேண்டும் என்பன உள்ளிட்ட பல்வேறு கோரிக்கைகள் வலியுறுத்தப்பட்டன.

மேலும் இந்த கோரிக்கைகளை வலியுறுத்தி விரைவில் அனைத்து பட்டுக்கூடு விவசாயிகள் சார்பில் கவன ஈர்ப்பு கூட்டம் நடத்துவது என முடிவு செய்யப்பட்டது. இந்த ஆலோசனை கூட்டத்தில் திண்டுக்கல், சாணார்பட்டி, ஒட்டன்சத்திரம் உள்ளிட்ட பல்வேறு பகுதிகளில் இருந்து ஏராளமான பட்டுக்கூடு விவசாயிகள் கலந்து கொண்டனர்.