நிலத்தகராறில் லாரி டிரைவர் கத்தியால் குத்திக்கொலை

ஆத்தூர்:

ஆத்தூர் அருகே நிலத்தகராறில் லாரி டிரைவரை கத்தியால் குத்திக்கொன்ற அண்ணன், தம்பியை போலீசார் வலைவீசி தேடி வருகிறார்கள்.

இந்த பயங்கர சம்பவம் குறித்து போலீஸ் தரப்பில் கூறப்பட்டதாவது:-

லாரி டிரைவர்

சேலம் மாவட்டம் ஆத்தூர் அருகே உள்ள கடம்பூர் கிராமம் வடக்கு தெரு பகுதியை சேர்ந்தவர் ராஜேந்திரன். இவரது மகன் சீனிவாசன் (வயது 40). லாரி டிரைவர். ராஜேந்திரனின் அக்காள் பங்காரு என்பவரது மகன் ரவிச்சந்திரன்.

இந்த நிலையில் ராஜேந்திரனுக்கும், ரவிச்சந்திரனுக்கும் நிலத்தகராறு இருந்து வந்தது. இதன் காரணமாக முன்விரோதம் ஏற்பட்டு இரு குடும்பத்தினரும் அடிக்கடி தகராறில் ஈடுபட்டு வந்துள்ளனர்.

குத்திக்கொலை

இதனிடையே நேற்று காலை தனது மோட்டார் சைக்கிளில் கடம்பூரில் இருந்து ஆத்தூருக்கு சீனிவாசன் சென்று கொண்டிருந்தார். அவரை ரவிச்சந்திரனின் மகன்கள் மணிகண்டன் (27), விஜய் (24) ஆகியோர் வழிமறித்தனர். பின்னர் அவர்கள் நிலம் தொடர்பாக சீனிவாசனிடம் பேசினார்கள். இதனால் அவர்களுக்கு இடையே வாக்குவாதம் ஏற்பட்டது. இதனால் ஆத்திரம் அடைந்த மணிகண்டன், விஜய் ஆகியோர் தாங்கள் மறைத்து வைத்திருந்த கத்தியால் சீனிவாசனை சரமாரியாக குத்தினார்கள்.

இதில் படுகாயம் அடைந்த அவர் சம்பவ இடத்திலேயே பரிதாபமாக உயிரிழந்தார். மேலும் அவரது அலறல் சத்தம் கேட்டு அக்கம்பக்கத்தினர் ஓடி வந்தனர். இதைப்பார்த்த மணிகண்டன், விஜய் ஆகியோர் அங்கிருந்து தப்பி ஓடி விட்டனர்.

வலைவீச்சு

இது குறித்து தகவல் அறிந்ததும் ஆத்தூர் போலீஸ் துணை சூப்பிரண்டு ராமச்சந்திரன், இன்ஸ்பெக்டர் ரஜினிகாந்த், சப்-இன்ஸ்பெக்டர் மணிமாறன் மற்றும் போலீசார் சம்பவ இடத்திற்கு விரைந்து சென்று விசாரணை நடத்தினர். மேலும் கொலை செய்யப்பட்ட லாரி டிரைவர் சீனிவாசன் உடலை கைப்பற்றி பிரேத பரிசோதனைக்காக ஆத்தூர் அரசு ஆஸ்பத்திரிக்கு அனுப்பி வைத்தனர். அவரது உடலை பார்த்து உறவினர்கள் கதறி அழுதது பரிதாபமாக இருந்தது.

இந்த சம்பவம் தொடர்பாக ஆத்தூர் போலீசார் வழக்குப்பதிவு செய்து தப்பி ஓடிய அண்ணன், தம்பிகளான மணிகண்டன், விஜய் ஆகியோரை வலைவீசி தேடி வருகிறார்கள்.

நிலத்தகராறில் லாரி டிரைவர் கொலை செய்யப்பட்ட சம்பவம் அந்த பகுதியில் பரபரப்பை ஏற்படுத்தி உள்ளது.