போலீஸ் நிலையம் முன்பு தற்கொலைக்கு முயன்றவர் கைது

திருவண்ணாமலை அருகே வடஅரசம்பட்டு கிராமத்தை சேர்ந்தவர் குயில் என்ற அருணாசலம் (வயது 25). இவர் மீது பல்வேறு குற்ற வழக்குகள் நிலுவையில் உள்ளது. இந்த நிலையில் அவர் நேற்று திருவண்ணாமலை கிழக்கு போலீஸ் நிலையத்துக்கு வந்தார்.

அப்போது போலீஸ் நிலையம் முன்பு திடீரென மண்எண்ணெய் கேனை எடுத்து தன் மீது ஊற்றிக்கொண்டு தற்கொலைக்கு முயன்றார். உடன் வந்த சிலரும் மண்எண்ணெய் ஊற்றிக் கொண்டதாக கூறப்படுகிறது.

இதைப்பார்த்த போலீசார் உடனடியாக ஓடிச் சென்று அவரை தடுத்து, அவர் மீது தண்ணீரை ஊற்றினர்.

தொடர்ந்து அவரை போலீசார் கைது செய்தனர்.

இதுகுறித்து போலீசார் கூறுகையில், குற்ற வழக்குகளில் தொடர்புடைய அவரை போலீசார் தேடி வந்தனர்.

இந்த நிலையில் தன்னை போலீசார் தொந்தரவு செய்வதாக கூறி, மண்எண்ணெய் ஊற்றி தற்கொலைக்கு முயன்றுள்ளார் என்றனர்.

இந்த சம்பவம் அங்கு பரபரப்பை ஏற்படுத்தியது.