மோட்டார் சைக்கிள் மீது லாரி மோதியது:சாலையில் விழுந்தவர் மீது சரக்கு வாகனம் மோதி சாவு

பனமரத்துப்பட்டி,

தறி தொழிலாளி

வீரபாண்டி அருகே பாலாம்பட்டி நூல்காரன்காடு பகுதியை சேர்ந்தவர் பழனி (வயது 55). தறி தொழிலாளி. இவர் நேற்று மதியம் தனது வீட்டில் இருந்து அரியானூர் நோக்கி தனது மொபட்டில் சென்று கொண்டிருந்தார்.

அவர் பாலம்பட்டி பிரிவு பகுதியில் சென்றபோது அங்கு சாலையோரம் நின்ற லாரி ஒன்று பின்னோக்கி வந்துள்ளது. இதைக்கண்ட பழனி மொபட்டை நிறுத்தி உள்ளார்.

சாவு

அப்படி இருந்தும் லாரி, மொபட் மீது மோதியுள்ளது. இதில் நிலைதடுமாறி பழனி சாலையில் விழுந்துள்ளார்.

அந்த வழியாக வந்த சரக்கு வாகனம் ஒன்று பழனி மீது மோதியது. இதில் சம்பவ இடத்திலேயே பழனி பரிதாபமாக இறந்துள்ளார். தகவல் அறிந்த மல்லூர் போலீசார் சம்பவ இடத்துக்கு வந்தனர்.

பழனி உடலை மீட்டு பிரேத பரிசோதனைக்கு அனுப்பி வைத்தனர். விபத்து குறித்து மல்லூர் போலீசார் வழக்குப்பதிவு செய்து விசாரணை நடத்தினர்.