மரத்தில் மோட்டார் சைக்கிள் மோதி மாணவர் பலி

வேடசந்தூர் அருகே உள்ள பூனூத்து கிராமத்தை சேர்ந்தவர் சுப்பிரமணி. இவரது மகன் பிரவீன்குமார் (வயது 14). இவர் திருவாரூரில் உள்ள தனியார் பள்ளியில் 9-ம் வகுப்பு படித்து வந்தார்.

இந்தநிலையில் நேற்று முன்தினம் இரவு பிரவீன்குமார், தனது வீட்டிற்கு வந்த உறவினரான சீல்நாயக்கன்பட்டியை சேர்ந்த சோமநாதனை (17) அவரது ஊருக்கு அழைத்துச்சென்று விடுவதற்காக மோட்டார் சைக்கிளில் சென்றார். மோட்டார் சைக்கிளை பிரவீன்குமார் ஓட்டினார். சோமநாதன் பின்னால் அமர்ந்து வந்தார். அழகாபுரி-வேடசந்தூர் சாலையில் ராமாநாயக்கனூர் பிரிவு அருகே அவர்கள் வந்தபோது, திடீரென்று கட்டுப்பாட்டை இழந்த மோட்டார் சைக்கிள் சாலையோரம் இருந்த மரத்தில் மோதியது.

இதில் மோட்டார் சைக்கிளில் இருந்து கீழே விழுந்த பிரவீன்குமார், சோமநாதன் ஆகியோர் படுகாயம் அடைந்தனர். இதையடுத்து அக்கம்பக்கத்தினர் அவர்கள் 2 பேரையும் மீட்டு சிகிச்சைக்காக திண்டுக்கல் அரசு மருத்துவமனைக்கு அனுப்பி வைத்தனர். ஆனால் அங்கு சிகிச்சை பலனின்றி பிரவீன்குமார் பரிதாபமாக இறந்தார். சோமநாதனுக்கு தீவிர சிகிச்சை அளிக்கப்பட்டு வருகிறது. இதுகுறித்து கூம்பூர் போலீசார் வழக்குப்பதிவு செய்து விசாரணை நடத்தி வருகின்றனர்.