பூட்டி இருக்கும் வீடுகளை பகலில் சாமியார் வேடத்தில் நோட்டமிட்டு இரவில் திருட்டில் ஈடுபட்ட வாலிபர்-போலீஸ் விசாரணையில் திடுக்கிடும் தகவல்

அயோத்தியாப்பட்டணம்:

40 பவுன் நகை திருட்டு

அயோத்தியாப்பட்டணம் அருகே உள்ள மின்னாம்பள்ளியை சேர்ந்தவர் ஓய்வு பெற்ற மின்வாரிய ஊழியர் சின்னசாமி (வயது 62). இவர் தனது குடும்பத்தினருடன் பழனிக்கு சென்று இருந்தார். அப்போது இவரது வீட்டின் பூட்டை உடைத்து 40 பவுன் நகை, ரூ.80 ஆயிரம் ரொக்கம் ஆகியவற்றை மர்ம நபர்கள் திருடி சென்றனர்.

இது குறித்த புகாரின் பேரில் காரிப்பட்டி போலீசார் வழக்குப்பதிவு செய்து, விசாரணை நடத்தினர். மேலும் தனிப்படை அமைக்கப்பட்டு மர்ம நபர்களை தேடினார்கள். இதைத்தொடர்ந்து இந்த திருட்டில் ஈடுபட்ட சேலம் கன்னங்குறிச்சி பகுதியை சேர்ந்த மணிகண்டன் (33). பொன்னம்மாபேட்டையை சேர்ந்த அமீர்ஜான் (34), செல்வராஜ் என்கிற சாகுல் ஹமீத் (53) ஆகிய 3 பேரை கடந்த 7-ந் தேதி கைது செய்தனர். இவர்களிடம் இருந்து 40 நகை, ரூ.80 ஆயிரம் மற்றும் திருட்டுக்கு பயன்படுத்திய ஆட்டோ ஆகியவற்றையும் பறிமுதல் செய்தனர்.

திடுக்கிடும் தகவல்

இந்த வழக்கில் கைது செய்யப்பட்டுள்ள மணிகண்டன் மீது, ஏற்கனவே சேலத்தில் 2 கொலை வழக்குகள் மற்றும் ஒரு கொலை முயற்சி வழக்கு, ஆள் கடத்தல் வழக்கு, கொள்ளை வழக்குகளும் உள்ளன. இதுமட்டுமின்றி, நாமக்கல், ஈரோடு, விருதுநகர், தென்காசி, தூத்துக்குடி, திருச்சி மற்றும் திருப்பூர் ஆகிய மாவட்டங்களில் உள்ள பல்வேறு போலீஸ் நிலையங்களிலும் கொள்ளை வழக்குகள் உள்பட 30-க்கும் மேற்பட்ட வழக்குகள் உள்ளன. இதனிடையே மணிகண்டனிடம் போலீசார் நடத்திய விசாரணையில் திடுக்கிடும் தகவல்கள் வெளியாயின.

அயோத்தியாப்பட்டணத்தில் மணிகண்டன், வீடு வாடகைக்கு எடுத்து தங்கி இருந்துள்ளார். அடிக்கடி தனது காதலியை வரவழைத்து உல்லாசமாக இருந்துள்ளார். மணிகண்டனை பல்வேறு மாவட்ட போலீசார் தேடி வந்ததால், போலீசில் சிக்காமல் இருக்க பகலில் சாமியார் வேடம் போட்டு சுற்றி வந்துள்ளார். அவரை கண்டு யாரும் சந்தேகப்படாத வகையில் உலா வந்துள்ளார்

பெண்களுடன் உல்லாசம்

பகலில் சாமியார் போல் பல்வேறு பகுதிகளுக்கு சென்று பூட்டி இருக்கும் வீட்டை நோட்டமிட்டு இரவில் அந்த வீட்டில் தனது கூட்டாளியுடன் சென்று கொள்ளையடித்தது விசாரணையில் தெரிய வந்துள்ளது, கொள்ளையடித்த பணம், தங்க நகைகள் உள்ளிட்ட பொருட்கள் கொண்டு பெண்கள் பலருடன் உல்லாசமாக இருந்தது போலீஸ் விசாரணையில் தெரியவந்துள்ளது.