உண்டியலை உடைத்து பணத்தை மூட்டை கட்டியபோது பிடிபட்ட கொள்ளையன்

தண்டராம்பட்டு,

தானிப்பாடி அருகே 4 ஆண்டுக்கு முன் திருடிய அதேஅம்மன் கோவிலில் உண்டியலை உடைத்து பணத்தை மூட்டைகட்டி கொண்டிருந்த கொள்ளையனை பொதுமக்கள் கையும் களவுமாக பிடித்து தர்ம அடி கொடுத்ததால் பரபரப்பு ஏற்பட்டது.

அம்மன் கோவில்

திருவண்ணாமலை மாவட்டம் தண்டராம்பட்டு தாலுகா தானிப்பாடியை அடுத்த நாவக்கொல்லை கிராமத்தில் பழமை வாய்ந்த மாரியம்மன் கோவில் உள்ளது. இக்கோவிலில் சுற்றுவட்டார பகுதிகளை சேர்ந்த பொதுமக்கள் வழிபட்டு வருகின்றனர்.

நேற்று முன்தினம் இரவு பூஜை முடிந்த பின்னர் பூசாரி கோவிலை வழக்கம்போல் பூட்டிவிட்டு சென்று விட்டார்.

உண்டியல் உடைப்பு

இந்நிலையில் நேற்று அதிகாலை 4 மணியளவில் கோவிலில் யாரோ பூட்டை உடைக்கும் சத்தம் கேட்டது. அந்த பகுதியில் வசிக்கும் தேவராஜ் என்பவர் எழுந்து வெளியே வந்து பார்த்துள்ளார்.

அப்போது ஒரு மர்ம ஆசாமி கோவிலின் பூட்டை உடைத்து கொண்டிருப்பதை பார்த்து அதிர்ச்சி அடைந்த அவர் அந்த பகுதியில் உள்ளவர்ளுக்கு தகவல் கொடுத்து அழைத்து வந்தார்.

அதற்குள் அந்தநபர் கோவிலுக்குள் சென்று அம்மன் கழுத்தில் இருந்த 9 கிராம் தங்க தாலியை திருடியதோடு உண்டியலை உடைத்து அதிலிருந்த பணம் ஆகியவற்றை மூட்டைக்கட்டி கொண்டிருந்தான். அங்கு வந்த பொதுமக்கள் அந்தநபரை கையும் களவுமாக மடக்கி பிடித்து தர்ம அடி கொடுத்தனர். இதனால் பரபரப்பு ஏற்பட்டது.

தகவல் அறிந்த தானிப்பாடி போலீசார் சம்பவ இடத்திற்கு சென்று பொதுமக்களிடம் இருந்து அவரை மீட்டு கைது செய்தனர்.

அம்மன் சிலை திருடியதும் அம்பலம்

விசாரணையில் பிடிபட்டவர் கிருஷ்ணகிரி மாவட்டம் காவேரிப்பட்டணம் கிராமத்தை சேர்ந்த சுந்தரவேல் (வயது 45) என்பதும் கடந்த 4 ஆண்டுகளுக்கு முன்பு கூட்டாளிகள் 3 பேருடன் இதே கோவிலுக்கு வந்து 110 கிலோ எடையுள்ள வெண்கல அம்மன் சிலை மற்றும் 2 கிலோ வெள்ளி கிரீடம், உண்டியல் பணத்தை திருடி சென்றதும் தெரிய வந்தது.

பொதுமக்கள் தாக்கியதில் காயமடைந்த கொள்ளையனை போலீசார் தானிப்பாடி அரசு மருத்துவமனையில் சேர்த்து சிகிச்சை அளித்தனர். பின்னர் அவரை கைது செய்தனர்.

திருடுவதற்காக வந்து கோவிலுக்கு அருகே உள்ள வனப்பகுதியில் நிறுத்தி வைத்திருந்த மோட்டார்சைக்கிளை பறிமுதல் செய்தனர்.

இந்த சம்பவம் தானிப்பாடி பகுதியில் பரபரப்பை ஏற்படுத்தியது.