நாய் குறுக்கே பாய்ந்ததால் விபத்து: கணவருடன் மொபட்டில் சென்ற பெண் தவறி விழுந்து சாவு

ராஜாக்கமங்கலம்,

ராஜாக்கமங்கலம் அருகே நாய் குறுக்கே பாய்ந்ததால் கணவருடன் மொபட்டில் சென்ற பெண் தவறி கீழே விழுந்து பரிதாபமாக இறந்தார்.

நாய் குறுக்கே பாய்ந்தது

ஈத்தாமொழி அருகே கேசவன்புத்தன்துறை பகுதியை சேர்ந்தவர் முத்தையா. இவருடைய மனைவி சரோஜா (வயது 60). இவர் குளச்சல் பகுதியில் உள்ள ஒரு வீட்டில் வேலை செய்து வந்தார். சம்பவத்தன்று முத்தையா தனது மொபட்டில் சரோஜாவை அமர வைத்து குளச்சல் நோக்கி புறப்பட்டார்.

மொபட் கல்லுக்கட்டி ஜங்சன் அருகே சென்ற போது சாலையின் குறுக்கே திடீரென நாய் ஒன்று பாய்ந்தது. இதில் நிலை தடுமாறி மொபட் கீழே விழுந்தது. இதில் சரோஜாவுக்கு தலையில் பலத்த காயம் ஏற்பட்டது.

பெண் சாவு

உடனே அவரை சிகிச்சைக்காக கணவர் முத்தையா மற்றும் சிலர் ஆம்புலன்ஸ் மூலம் மீட்டு ஆசாரிபள்ளம் அரசு மருத்துவமனைக்கு கொண்டு சென்றனர். அங்கு அவருக்கு தீவிர சிகிச்சை அளிக்கப்பட்டு வந்தது.

இந்தநிலையில் சிகிச்சை பலனின்றி நேற்று முன்தினம் இரவு சரோஜா பரிதாபமாக உயிரிழந்தார். இது குறித்த புகாரின் பேரில் ராஜாக்கமங்கலம் போலீசார் வழக்குப்பதிவு செய்து விசாரணை நடத்தி வருகின்றனர்.