வல்லநாடு அருகே மீன் ஏற்றி வந்த வேனும், தனியார் கியாஸ் டேங்கர் லாரியும் மோதி விபத்துக்குள்ளானதில், தொழிலாளி பலியானார்.

ஸ்ரீவைகுண்டம்:

வல்லநாடு அருகே மீன் ஏற்றி வந்த வேனும், தனியார் கியாஸ் டேங்கர் லாரியும் மோதி விபத்துக்குள்ளானதில், தொழிலாளி பலியானார். மேலும் 5 பேர் படுகாயம் அடைந்தனர்.

மீன் லோடு வேன்

நெல்லை மாவட்டம் கோபாலசமுத்திரம் அகதிகள் முகாம் பகுதியை சேர்ந்த லட்சுமணன் மகன் செல்வராஜ் (வயது 60). தொழிலாளி. இவரும், நெல்லை மாவட்டம் முக்கூடல் அருகே உள்ள சிங்கம்பாறை ராசா சேவியர் மகன் மில்டன் (36), ஆரோக்கிய ரூபன் (29), முக்கூடல் இலந்தைகுளம் லூர்து மகன் வர்கீஸ் (37), திருவேங்கடநாதபுரம் பாலாஜி நகர் பெருமாள் மகன் சந்திரன் (32), மாரியப்பன் மகன் பெரிய துரை (27) ஆகியோர் நேற்று முன்தினம் இரவு தூத்துக்குடிக்கு சென்றனர். அங்கு மீன்களை ஏற்றிக் கொண்டு லாரியில் நெல்லை நோக்கி வந்து கொண்டிருந்தனர். வேனை டிரைவர் மில்டன் ஓட்டி சென்றார்.

டேங்கர் லாரி-வேன் மோதல்

நேற்று அதிகாலை 1 மணி அளவில் நெல்லை- தூத்துக்குடி நான்கு வழிச்சாலை வல்லநாடு துப்பாக்கி சுடுதளம் தாண்டி முன்னால் சென்று கொண்டிருந்த தனியார் கியாஸ் லாரியை வேன் முந்தி சென்றுள்ளது. உடனே இடது புறமாக வேனை டிரைவர் திருப்பி உள்ளார். இதனால் டேங்கர் லாரியின் முன்புறத்தில் வேன் மோதி விபத்துக்குள்ளானது. கண்இமைக்கும் நேரத்தில் சாலையில் வேன் கவிழ்ந்து விபத்துக்குள்ளானது. இந்த கோர விபத்தில் வேன் இருந்த 6 பேரும் சாலையில் தூக்கி வீசப்பட்டு படுகாயம் அடைந்தனர்.

தொழிலாளி சாவு

இதில் தொழிலாளி செல்வராஜ் உடல் நசுங்கி சம்பவ இடத்திலேயே ரத்தவெள்ளத்தில் பரிதாபமாக உயிரிழந்தார். அவருடன் இருந்த ஆரோக்கிய ரூபன், மில்டன், வர்கீஸ், சந்திரன், பெரிய துரை ஆகிய 5 பேரும் படுகாயத்துடன் ரத்தவெள்ளத்தில் சாலையில் கிடந்தனர். மேலும் வேனில் இருந்த மீன்கள் சாலையில் சிதறி கடந்தன.

இதனால் அந்த பகுதியில் பரபரப்பு காணப்பட்டது. இதுகுறித்து தகவல் அறிந்து முறப்பநாடு போலீசார் சம்பவ இடத்திற்கு சென்று செல்வராஜ் உடலை மீட்டு பாளையங்கோட்டை ஐகிரவுண்டு அரசு மருத்துவமனைக்கு பிரேத பரிசோதனைக்கு அனுப்பி வைத்தனர்.

5 பேருக்கு சிகிச்சை

மேலும் படுகாயங்களுடன் கிடந்த மற்ற 5 பேரையும் போலீசார் பாதுகாப்பாக மீட்டு அதே மருத்துவமனைக்கு சிகிச்சைக்காக அனுப்பி வைத்தனர். இதுகுறித்து முறப்பநாடு போலீசார் வழக்குப்பதிவு செய்து கியாஸ் டேங்கர் லாரி டிரைவர் புதுக்கோட்டை மாவட்டம் கீரனூர் சின்னையா மகன் சண்முகத்திடம் விசாரணை நடத்தி வருகின்றனர்.