சேலத்தில் ஆடித்திருவிழா: கோட்டை மாரியம்மன் கோவிலில் பூச்சாட்டுதல்

பூச்சாட்டுதல் விழா

சேலம் மாவட்டத்தில் ஆடி மாதம் என்றாலே அம்மன் கோவில்களில் திருவிழாக்கள் களை கட்டுவது வழக்கம். சேலத்தில் பிரசித்தி பெற்ற கோட்டை மாரியம்மன் கோவிலில் ஆடித்திருவிழா ஆண்டுதோறும் விமரிசையாக நடைபெறும். ஆனால் கொரோனா நோய் தொற்று கட்டுப்பாடு காரணமாகவும், கோவிலில் திருப்பணிகள் நடைபெறுவதாலும் கடந்த 2 ஆண்டுகளாக ஆடித்திருவிழா நடத்தப்படவில்லை.

இந்த நிலையில் கோட்டை மாரியம்மன் கோவிலில் இந்த ஆண்டு ஆடித்திருவிழா கடந்த 15-ந் தேதி முகூர்த்தக்கால் நடப்பட்டது. அதைத்தொடர்ந்து தினமும் அம்மனுக்கு சிறப்பு பூஜை நடைபெற்று வருகிறது. இந்த நிலையில் நேற்று இரவு கோட்டை மாரியம்மன் கோவிலில் பூச்சாட்டுதல் விழா நடந்தது. இதையொட்டி மாரியம்மனுக்கு சிறப்பு அலங்காரம் செய்யப்பட்டு தீபாராதனை நடைபெற்றது.

ஊர்வலம்

இதையொட்டி சோழ வேளாளர் சமூகம் டிரஸ்ட் தலைவர் வையாளி தலைமையில் பூக்கூடை ஊர்வலம் நடநதது. கிச்சிப்பாளையம் கந்தசாமி தெருவில் உள்ள பஜனை மடம் வீதியில் தொடங்கிய ஊர்வலத்தில் திரளான பக்தர்கள் கலந்து கொண்டனர். இந்த ஊர்வலம் திருநாவுக்கரசர் தெரு, சின்ன மாரியம்மன் கோவில் தெரு, சன்னியாசிக்குண்டு மெயின்ரோடு உள்ளிட்ட முக்கிய வீதிகள் வழியாக கோட்டை மாரியம்மன் கோவிலை வந்தடைந்தது.

பின்னர் மாரியம்மனுக்கு பூச்சாட்டுதல் நடத்தப்பட்டது. தொடர்ந்து சிறப்பு பூஜைகளும் நடைபெற்றது. பக்தர்கள் பலர் தாங்கள் கொண்டு வந்த பூக்களை அம்மனுக்கு படைத்து வழிபட்டனர். ஊர்வலத்தில் சோழ வேளாளர் சமூகம் டிரஸ்ட் செயலாளர் தமிழரசன், துணை செயலாளர் ஆனந்தன், நிர்வாகிகள் இளங்கோவன், கவுரி சங்கர், கதர் ஆர்.செல்வராஜ், சண்முகம், ஜிம் குமரேசன், சங்கீதா வீரகுமார், சதாசிவம், விஜயலட்சுமி ஆறுமுகபிள்ளை மற்றும் நிர்வாகிகள் பலர் கலந்து கொண்டனர். விழாவையொட்டி கோவிலில் ஏராளமான போலீசார் பாதுகாப்பு பணியில் ஈடுபட்டனர்.

ரூபாய் நோட்டு அலங்காரம்

சேலம் கோட்டை மாரியம்மன் கோவில் பூச்சாட்டுதல் உற்சவத்தை தொடர்ந்து சேலம் குகை மாரியம்மன்-காளியம்மன் கோவில், தாதகாப்பட்டி கேட் சஞ்சீவராயன்பேட்டை மாரியம்மன், பலப்பட்டரை மாரியம்மன், சின்னக்கடை வீதி சின்னமாரியம்மன், செவ்வாய்பேட்டை மாரியம்மன், அன்னதானப்பட்டி மாரியம்மன் உள்பட 8 பேட்டை மாரியம்மன் கோவில்களிலும் பூச்சாட்டுதலுடன் ஆடித்திருவிழா தொடங்கியது.

கோட்டை மாரியம்மன் கோவிலில் வருகிற 8-ந் தேதி இரவு சக்தி அழைப்பும், 9-ந் தேதியில் இருந்து 3 நாட்கள் பொங்கல் வழிபாடு, மாவிளக்கு எடுத்தல் உள்ளிட்டவையும், அதைத்தொடர்ந்து 16-ந் தேதி பால்குட ஊர்வலம் நடைபெறுகிறது. இதே போல சேலம் களரம்பட்டி புத்துமாரியம்மன் கோவிலில் பூச்சாட்டுதல் விழா நேற்று இரவு நடந்தது. இதையொட்டி 6 லட்சம் ரூபாய் நோட்டுகளால் அம்மனுக்கு சிறப்பு அலங்காரம் செய்யப்பட்டது. இதில் பக்தர்கள் பலர் கலந்து கொண்டு அம்மனை வழிபட்டனர்.