ஈரோட்டில் இரவில் ஸ்கூட்டரில் சென்றபோது விபத்துபஸ் சக்கரத்தில் சிக்கி இளம்பெண் பலி

ஈரோட்டில் இரவில் ஸ்கூட்டரில் சென்றபோது நடந்த விபத்தில் பஸ் சக்கரத்தில் சிக்கி இளம்பெண் பரிதாபமாக உயிரிழந்தார்.

பெண் பலி

ஈரோடு கொத்துக்காரத்தோட்டம் பகுதியை சேர்ந்தவர் ராஜா. இவருடைய மகள் ஜீவா (வயது 18). இவர் தனது தோழியுடன் ஸ்கூட்டரில் நேற்று இரவு சென்று கொண்டிருந்தார். ஈரோடு மார்க்கெட் ரோட்டில் இருந்து சத்தி ரோட்டை கடக்க முயன்றபோது, ஈரோட்டில் இருந்து கவுந்தப்பாடி நோக்கி சென்ற அரசு பஸ்சின் பக்கவாட்டில் ஸ்கூட்டர் மோதியது.

இதில் பின்னால் அமர்ந்திருந்த ஜீவா நிலை தடுமாறி கீழே விழுந்தார். அப்போது பஸ்சின் பின்புற சக்கரத்தில் சிக்கி படுகாயம் அடைந்து சம்பவ இடத்திலேயே ஜீவா பரிதாபமாக உயிரிழந்தார்.

உயிர் தப்பினார்

இதைப்பார்த்த அக்கம் பக்கத்தினர் இதுகுறித்து ஈரோடு வீரப்பன்சத்திரம் போலீசாருக்கு தகவல் கொடுத்தனர். அதன்பேரில் போலீசார் விரைந்து சென்று ஜீவாவின் உடலை மீட்டு பிரேத பரிசோதனைக்காக 108 ஆம்புலன்ஸ் மூலம் ஈரோடு அரசு ஆஸ்பத்திரிக்கு அனுப்பி வைத்தனர். ஸ்கூட்டரை ஓட்டி வந்த பெண் எந்தவித காயமும் இன்றி உயிர் தப்பினார். இதுகுறித்து வீரப்பன்சத்திரம் போலீசார் வழக்குப்பதிவு செய்து விசாரணை நடத்தி வருகிறார்கள்.