அதியமான்கோட்டை அரசு பள்ளி மாணவிகள் சாதனை

தர்மபுரியில் உள்ள மாவட்ட விளையாட்டு அரங்கில் மாவட்ட அளவிலான தடகள போட்டிகள் நடைபெற்றது. இந்த போட்டிகளில் மாவட்டம் முழுவதிலும் இருந்து அரசு மற்றும் தனியார் பள்ளிகளை சேர்ந்த மாணவ, மாணவிகள் கலந்து கொண்டு பல்வேறு போட்டிகளில் வெற்றி பெற்று சாதனை படைத்தனர். இதில் மூத்தோர் மற்றும் மிக மூத்தோர் பிரிவு போட்டிகளில் அதியமான்கோட்டை அரசு மகளிர் மேல்நிலைப்பள்ளி மாணவிகள் எறிப்பந்து, கோ-கோ, 300 மீட்டர் ஓட்டம், 1500 மீட்டர் ஓட்டம், உயரம் தாண்டுதல், மும்முறை தாண்டுதல், ஈட்டி எறிதல், சிலம்பம் ஆகிய பிரிவுகளில் தங்கப்பதக்கம் பெற்று சாதனை படைத்தனர். மேலும் கோ-கோ இளையோர் பிரிவில் வெள்ளிப்பதக்கம் பெற்றனர். இந்த மாணவிகள் மாநில அளவிலான தடகள போட்டியில் கலந்து கொள்ள தகுதி பெற்றுள்ளனர். சாதனை படைத்த மாணவிகளை பள்ளி தலைமை ஆசிரியை சந்திரலேகா, உடற்கல்வி ஆசிரியர்கள் கீதா, மாது மற்றும் ஆசிரிய-ஆசிரியைகள், பெற்றோர் ஆசிரியர் கழக நிர்வாகிகள், மேலாண்மை குழு உறுப்பினர்கள் பாராட்டி வாழ்த்து தெரிவித்தனர்.