4 டன் வேளாண் விளைபொருட்கள் ஏலம்

முத்தூர் ஒழுங்குமுறை விற்பனை கூடத்தில் 4 டன் வேளாண் விளை பொருட்கள் ஏலம் விடப்பட்டது.

ஒழுங்குமுறை விற்பனை கூடம்

முத்தூர் ஒழுங்குமுறை விற்பனை கூடத்தில் வாரந்தோறும் சனிக்கிழமை தேங்காய், தேங்காய் பருப்பு, எள் ஆகிய வேளாண் விளை பொருட்களின் ஏலம் நடைபெற்று வருகிறது. இதில் முத்தூர் நகர மற்றும் சுற்றுவட்டார கிராம பகுதி விவசாயிகள் மற்றும் ஈரோடு, கரூர் மாவட்ட பகுதிகளை சேர்ந்த விவசாயிகள் பலர் நேரில் கலந்து கொண்டு தங்களது வேளாண் விளை பொருட்களை விற்று பலன் அடைந்து வருகின்றனர்.

இதன்படி நேற்று காலை ஒழுங்குமுறை விற்பனை கூடத்திற்கு சுற்றுவட்டார விவசாயிகள் 7,514 தேங்காய்களை ஏலத்திற்கு கொண்டு வந்திருந்தனர். இதனை தொடர்ந்து டெண்டர் முறையில் ஏலம் நடைபெற்றது. இதில் ஒரு கிலோ தேங்காய் அதிகபட்ச விலையாக ரூ.23.45-க்கும், குறைந்தபட்ச விலையாக ரூ.18.15-க்கும் ஏலம் விடப்பட்டது.

தேங்காய் பருப்பு ஏலம்

மேலும் 28 தேங்காய் பருப்பு மூட்டைகள் ஏலம் விடப்பட்டதில் ஒரு கிலோ தேங்காய் பருப்பு அதிகபட்ச விலையாக ரூ.75.90-க்கும், குறைந்தபட்ச விலையாக ரூ.56.10-க்கும் டெண்டர் முறையில் ஏலம் விடப்பட்டது. கடந்த வாரத்தை விட இந்த வாரம் 4 ஆயிரத்து 89 தேங்காய்கள் கூடுதலாகவும், 17 தேங்காய் பருப்பு மூட்டைகள் குறைவாகவும் கொண்டு வரப்பட்டு ஏலம் விடப்பட்டது.

இதில் தேங்காய் ஒரு கிலோவிற்கு 5 பைசா குறைவாகவும், தேங்காய் பருப்பு ஒரு கிலோவிற்கு ரூ.1.30 கூடுதலாகவும் விவசாயிகளுக்கு கிடைத்தது. மேலும் கடந்த 3 மாத காலமாக வரத்து இல்லாததால் எள் ஏலம் நடைபெறவில்லை. கடந்த 9 மாதங்களுக்கு முன்பு தேங்காய் பருப்பு விலை கிலோ ரூ.90-ஐ தாண்டி ஏலம் விடப்பட்டு வந்த நிலையில் தற்போது வரை ரூ.90-க்கும் கீழே விலை சரிந்து ஏலம் விடப்பட்டு வருவது குறிப்பிடத்தக்கது. இப்பகுதிகளில் பெய்து வரும் பலத்த மழை காரணமாக தேங்காய் வரத்து ஒழுங்குமுறை விற்பனை கூடத்திற்கு குறைவாகவே கொண்டு வரப்பட்டது.

4 டன் ஏலம்

ஒழுங்குமுறை விற்பனை கூடத்தில் தேங்காய், தேங்காய் பருப்பு 4 டன் அளவில் மொத்தம் ரூ‌.1 லட்சத்து 6 ஆயிரத்து 91-க்கு வேளாண் விளை பொருட்கள் ஏலம் விடப்பட்டது. ஏலங்களில் திருப்பூர், ஈரோடு, கரூர் மாவட்டங்களை சேர்ந்த வியாபாரிகள் கலந்து கொண்டனர். இத்தகவலை முத்தூர் ஒழுங்குமுறை விற்பனைக்கூட மேற்பார்வையாளர் கே.தங்கவேல் தெரிவித்து உள்ளார்.