கால்பந்து போட்டியில் அமெரிக்கன் கல்லூரி அணி சாம்பியன்

மேலூர்,

மதுரை காமராஜர் பல்கலைக்கழக 'ஏ' மண்டல அளவிலான கல்லூரிகளுக்கான கால்பந்துப் போட்டி மேலூர் அரசு கலைக் கல்லூரியில் நடைபெற்றது. முதலாவது காலிறுதிப் போட்டியில் அல்ட்ரா கல்லூரியை யாதவர் கல்லூரி அணி 0-4 கோல் கணக்கில் வென்றது. 2-வது காலிறுதிப்போட்டியில் வக்போர்டு கல்லூரியை சுப்புலட்சுமி லட்சுமிபதி கல்லூரி அணி 3-4 என்ற கோல் கணக்கில் வென்றது.

3-வது காலிறுதிப் போட்டியில் தியாகராசர் கல்லூரியை மேலூர் அரசு கலைக்கல்லூரி 1-2 கோல் கணக்கில் வெற்றி பெற்றது. அதனைத்தொடர்ந்து நடந்த முதலாவது அரையிறுதிப் போட்டியில் லட்சுமிபதி கல்லூரியை அமெரிக்கன் கல்லூரி அணி 0-3 கோல் கணக்கில் வென்று இறுதிபோட்டிக்கு தகுதி பெற்றது. இரண்டாவது அரையிறுதிப் போட்டியில் மேலூர் அரசு கல்லூரியை யாதவர் கல்லூரி அணி 0-3 கோல் கணக்கில் வென்றது. இறுதிப் போட்டியில் அமெரிக்கன் கல்லூரி, யாதவா கல்லூரி அணிகள் மோதின.போட்டியை கல்லூரி முதல்வர் மணிமேகலாதேவி தொடங்கி வைத்தார். இதில் 3-0 என்ற கோல் கணக்கில் அமெரிக்கன் கல்லூரி அணி வென்று சாம்பியன் பட்டத்தை கைப்பற்றியது. போட்டிக்கான ஏற்பாடுகளை மேலூர் அரசு கல்லூரி உடற்கல்வி இயக்குனர் எம்.கிருஷ்ணமூர்த்தி செய்திருந்தார். கல்லூரி மாணவ மாணவியர்கள், பேராசிரியர்கள் கலந்து கொண்டனர்.