குட்டையில் மூழ்கி மூதாட்டி பலி

சாணார்பட்டி அருகே உள்ள மலைப்பட்டியை சேர்ந்தவர் நாகப்பன். அவருடைய மனைவி ராமக்காள் (வயது 75). கடந்த சில தினங்களுக்கு முன்பு இவர், சோழக்குளத்துப்பட்டியில் தனது மகள் வீட்டுக்கு வந்தார். நேற்று முன்தினம் மாலை இவர், துணி துவைப்பதற்காக அப்பகுதியில் உள்ள குட்டைக்கு சென்றதாக கூறப்படுகிறது. ஆனால் நீண்டநேரமாகியும் அவர் வீடு திரும்பவில்லை. இதனையடுத்து அவரது குடும்பத்தினர் பல்வேறு இடங்களில் தேடினர். இருப்பினும் அவரை பற்றி எந்த தகவலும் கிடைக்கவில்லை.

இந்தநிலையில் நேற்று காலை அங்குள்ள ஒரு குட்டையில் ராமக்காள் உடல் மிதந்தது. துணி துவைக்க சென்ற அவர், கால்வழுக்கி குட்டைக்குள் விழுந்து தண்ணீரில் மூழ்கி இறந்திருக்கலாம் என்று கருதப்படுகிறது. இதுகுறித்து தகவல் அறிந்த சாணார்பட்டி போலீஸ் சப்-இன்ஸ்பெக்டர் ஜான்சன் ஜெயக்குமார் தலைமையிலான போலீசார் அங்கு விரைந்தனர். பின்னர் அவரது உடலை மீட்டு, பிரேத பரிசோதனைக்காக திண்டுக்கல் அரசு ஆஸ்பத்திரிக்கு போலீசார் அனுப்பி வைத்தனர். மேலும் வழக்குப்பதிவு செய்து போலீசார் விசாரணை நடத்தி வருகின்றனர்.