மீன் வளர்க்க மானியம் பெற விண்ணப்பிக்கலாம்

தமிழ்நாட்டில் மீன்வளர்ப்பினை ஊக்குவித்திட மானியம் வழங்கும் திட்டம் செயல்படுத்தப்பட உள்ளது. அதன்படி அரியலூர் மாவட்டத்தில் மாவட்ட கலெக்டரை தலைவராக கொண்டு செயல்பட்டு வரும் மாவட்ட மீன் வளர்ப்போர் மேம்பாட்டு முகமையில் பதிவு பெற்ற மீனவ விவசாயிகள், சொந்த நிலத்தில் 250 முதல் 1,000 ச.மீ. அளவிலுள்ள பல்நோக்கு பண்ணை குட்டைகளில் மீன் வளர்ப்பினை மேற்கொள்ள ஏதுவாக மீன் குஞ்சு, மீன் தீவனம், உரங்கள் ஆகிய மீன் வளர்ப்பிற்கான உள்ளீட்டு பொருட்கள் மற்றும் பறவை வேலி அமைத்தல் ஆகியவற்றிற்கு ஒரு அலகிற்கு ஆகும் செலவினமான ரூ.36 ஆயிரத்தில் 50 சதவீதம் மானியத்தில் ஒரு பண்ணை குட்டைக்கு ரூ.18 ஆயிரம் மானிய தொகை வழங்கப்படும். மேற்கண்ட மானிய தொகையானது பின்னேற்பு மானியமாக வழங்கப்படும். முதலில் வரும் விண்ணப்பத்திற்கு முன்னுரிமை அளித்து மூப்புநிலை அடிப்படையில் மானியம் பெறுவதற்கு தேர்ந்தெடுக்கப்படுவார்கள். எனவே, மேற்படி திட்டத்தின் கீழ் விண்ணப்பிக்க விரும்பும் பயனாளிகள் அரியலூர் மாவட்ட கலெக்டர் அலுவலகத்தில் 2-வது தளத்தில் அறை எண் 234-ல் உள்ள மீன்வளம் மற்றும் மீனவர் நலத்துறை உதவி இயக்குனர் அலுவலகத்தை நேரிலோ அல்லது 04329-228699 என்ற தொலைபேசி எண்ணிலோ அல்லது 6381344399 என்ற செல்போன் எண்ணிலோ தொடர்பு கொள்ளலாம். மேலும் அலுவலகத்தில் விண்ணப்பங்களை பெற்று, பூர்த்தி செய்து உரிய ஆவணங்களுடன் விண்ணப்பங்களை நாளைக்குள் (வெள்ளிக்கிழமை) அலுவலகத்தில் சமர்ப்பிக்க வேண்டும் என்று மாவட்ட கலெக்டர் அலுவலகம் சார்பில் தெரிவிக்கப்பட்டுள்ளது.