'ஜீவன் ரக்‌ஷா' பதக்க விருது பெற விண்ணப்பிக்கலாம்

தூத்துக்குடி மாவட்டத்தில் விபத்துகளில் மனித உயிர்களை காப்பாற்றி சாதனை படைத்தவர்கள் 'ஜீவன் ரக்‌ஷா' பதக்க விருதுகள் பெற விண்ணப்பிக்கலாம் என்று மாவட்ட கலெக்டர் செந்தில்ராஜ் தெரிவித்து உள்ளார்.

இது குறித்து அவர் வெளியிட்டுள்ள செய்திக்குறிப்பில் கூறி இருப்பதாவது:-

ஜீவன் ரக்‌ஷா விருது

இந்திய அரசின் சார்பில் பல்வேறு நிகழ்வுகளான நீரில் மூழ்கியவரை காப்பாற்றுதல், மின்சார விபத்துக்கள், தீ விபத்துக்கள், நிலச்சரிவு, விலங்கின தாக்குதல், சுரங்க மீட்பு நடவடிக்கைகளில் ஈடுபட்டு மனித உயிர்களை மீட்பவர்களுக்கு ஜீவன் ரக்‌ஷா பதக்க விருதுகள் வழங்கப்பட்டு வருகிறது.

அதன்படி மிகவும் அபாயகரமான நிலையில் உள்ளவரை வீரத்துடன் போராடி மீட்பவர்களுக்கு சர்வோத்தம் ஜீவன் ரக்‌ஷா பதக்கம் விருதும், துணிச்சலுடன், தாமதமின்றி செயல்பட்டு மிகவும் அபாயகரமான நிலையில் உள்ளவரை போராடி மீட்பவர்களுக்கு உத்தம் ஜீவன் ரக்‌ஷா பதக்கம் விருதும், தனக்கு காயம் ஏற்பட்டாலும், தாமதமின்றி செயல்பட்டு உயிரை காப்பாற்றுபவர்களுக்கு ஜீவன் ரக்‌ஷா பதக்கம் விருதும் வழங்கப்படுகிறது.

விண்ணப்பிக்கலாம்

2022-ம் ஆண்டுக்கான ஜீவன் ரக்‌ஷா பதக்க விருதுக்கான விண்ணப்பங்கள் வரவேற்கப்படுகின்றன. இதற்கான விண்ணப்பங்களை மாவட்ட விளையாட்டு மற்றும் இளைஞர் நலன் அலுவலர், தமிழ்நாடு விளையாட்டு மேம்பாட்டு ஆணையம், மாவட்ட விளையாட்டரங்கம், ஜார்ஜ் ரோடு, தூத்துக்குடி - 628 001, தொலைபேசி எண் : 0461-2321149 என்ற முகவரியில் அலுவலக நேரத்தில் பெற்றுக் கொள்ளலாம். இதே முகவரியில் பூர்த்தி செய்யப்பட்ட விண்ணப்பங்களை 10.8.2022-க்குள் சமர்ப்பிக்க வேண்டும்.

இவ்வாறு அவர் தெரிவித்து உள்ளார்.