ஈரோட்டில் தீவிரவாதிகள் பதுங்கலா? என்.ஐ.ஏ. அதிகாரிகள் திடீர் சோதனையால் பரபரப்பு

ஈரோட்டில் தீவிரவாதிகள் பதுங்கி இருக்கிறார்கலா? என்பதை கண்டறிய என்.ஐ.ஏ. அதிகாரிகள் திடீர் சோதனையில் ஈடுபட்டதால் பரபரப்பு ஏற்பட்டது.

தீவிரவாதிகள்

ஈரோட்டில் தீவிரவாதிகள் பதுங்கி இருப்பதாக தேசிய புலனாய்வு முகமை (என்.ஐ.ஏ.) பிரிவுக்கு ரகசிய தகவல் கிடைத்தது. இதைத் தொடர்ந்து சென்னையில் இருந்து 3 பேர் கொண்ட குழுவினர் ஈரோடு விரைந்து வந்தனர். பின்னர் ஈரோடு மாவட்ட போலீஸ் சூப்பிரண்டு அலுவலகத்தில் தங்களது விசாரணையை தொடங்கினர். இதைத்தொடர்ந்து ஈரோடு போலீசாருடன் சேர்ந்து, என்.ஐ.ஏ. அதிகாரிகள், தீவிரவாதிகள் பதுங்கி இருப்பதாக கூறப்பட்ட ஈரோடு மாணிக்கம்பாளையம் மெயின் ரோட்டில் உள்ள ஒரு வீட்டுக்கு நேற்று இரவு வந்தனர்.

பலத்த போலீஸ் பாதுகாப்பு

பின்னர் அந்த வீட்டை சுற்றி பலத்த போலீஸ் பாதுகாப்பு போடப்பட்டது. இதைத் தொடர்ந்து என். ஐ.ஏ. அதிகாரிகள் மற்றும் போலீசார் அதிரடியாக அந்த வீட்டுக்குள் நேற்று இரவு நுழைந்தனர். அப்போது அந்த வீட்டில் 5 பேர் ஒரு குடும்பமாக வசித்து வந்தது தெரியவந்தது. இதைத்தொடர்ந்து அங்கு இருந்த 2 பேரை மட்டும் ரகசிய இடத்துக்கு அழைத்து சென்று விசாரணையை தீவிரப்படுத்தினர். மேலும் வீட்டில் தகவல் தொடர்புக்கு பயன்படுத்தப்பட்ட ஸ்மார்ட் போன், லேப்டாப், டைரிகள், சிம்கார்டுகள், வங்கி பாஸ் புக் உள்ளிட்ட ஆவணங்களை கைப்பற்றி தொடர்ந்து தீவிர விசாரணையில் ஈடுபட்டனர்.

இரவு 11.20 மணி அளவில் என்.ஐ.ஏ. அதிகாரிகள் சோதனையை முடித்துக்கொண்டு புறப்பட்டு சென்றனர். இதனால் ஈரோடு மாணிக்கம் பாளையம் பகுதி பரபரப்பாக காணப்பட்டது.

பெரும் அதிர்ச்சி

பிரதமர் நரேந்திரமோடி உலக அளவில் நடக்கும் செஸ் ஒலிம்பியாட் போட்டியை தொடங்கி வைக்க தமிழகம் வர உள்ள நிலையில் என்.ஐ.ஏ. குழுவினர் தீவிரவாதிகளை தேடி ஈரோட்டில் அதிரடி சோதனையில் ஈடுபட்டு இருப்பது பெரும் அதிர்ச்சியை ஏற்படுத்தி உள்ளது.

இதுகுறித்து போலீசார் கூறும்போது, 'பெங்களூரு திலக் நகர் பகுதியில் அல்கொய்தா தீவிரவாத அமைப்புடன் தொடர்பில் இருந்த அக்தர் உசேன் லஸ்கர் என்பவர் கடந்த 24-ந் தேதி கைது செய்யப்பட்டார். அவரிடம் விசாரணை நடத்தப்பட்டது. அவர் கொடுத்த தகவலின் அடிப்படையில் சேலத்தில் பதுங்கி இருந்த அப்துல் அலி ஜூபா என்பவரை மத்திய குற்றப்பிரிவு போலீசார் கைது செய்தனர். இவர் அளித்த தகவலின் அடிப்படையில் ஈரோடு மாணிக்கம் பாளையம் பகுதியில் உள்ள வீட்டில் என்.ஐ.ஏ. அதிகாரிகள் விசாரணை நடத்தி வருகின்றனர்' என்றனர்.