வேறு இடத்தில் திருமணம் செய்ய ஏற்பாடு: விஷம் குடித்த கல்லூரி மாணவி சாவு

தர்மபுரி,

தர்மபுரி மாவட்டம் பாலக்கோடு அருகே உள்ள ஜிட்டாண்டஅள்ளி கொல்லப்பட்டியை சேர்ந்தவர் முனியப்பன். இவருடைய மகள் சினேகா (வயது 19). இவர் பாலக்கோடு பகுதியில் உள்ள அரசு பாலிடெக்னிக் கல்லூரியில் 2-ம் ஆண்டு படித்து வந்தார்.

ஜிட்டாண்டஅள்ளி அருகே உள்ள குளிக்காடு பகுதியை சேர்ந்தவர் தமிழரசு (18). இவர் தர்மபுரியில் உள்ள ஐ.டி.ஐ.யில் 2-ம் ஆண்டு படித்து வருகிறார். இவர்கள் 2 பேரும் பஸ்சில் கல்லூரிகளுக்கு செல்லும் போது பழக்கம் ஏற்பட்டு நாளடைவில் காதலாக மாறியது. கடந்த வாரம் சினேகாவிற்கு வேறு இடத்தில் திருமணம் செய்ய பெற்றோர் ஏற்பாடு செய்து வந்தனர்.

மாணவி சாவு

இதனால் காதல் ஜோடி கடந்த 7-ந் தேதி வீட்டை விட்டு வெளியேறி பாலக்கோடு அருகே உள்ள முருகன் கோவிலில் திருமணம் செய்து கொண்டது. இதையடுத்து அவர்கள், நாங்கள் முருகன் கோவிலில் திருமணம் செய்து கொண்டோம். ஆனால் தற்கொலை செய்து கொள்ள போகிறோம் என குடும்பத்தினர் மற்றும் உறவினர்களுக்கு செல்போனில் வாய்ஸ் மெசேஜ் அனுப்பிவிட்டு விஷம் குடித்துள்ளனர்.

செல்போனில் வந்த தகவலை பார்த்துவிட்டு 2 பேரின் உறவினர்களும் அலறி அடித்துகொண்டு அவர்கள் தெரிவித்த கோவிலுக்கு சென்று பார்த்தனர். அப்போது 2 பேரும் வாயில் நுரை தள்ளியபடி உயிருக்கு போராடி கொண்டு இருந்தனர். இதையடுத்து அவர்கள் 2 பேரையும் மீட்டு தர்மபுரி அரசு மருத்துவமனையில் உறவினர்கள் சேர்த்தனர். அங்கு தீவிர சிகிச்சை அளித்தும் பலனின்றி நேற்று காலை சினேகா பரிதாபமாக உயிரிழந்தார்.

தீவிர சிகிச்சை

காதலன் தமிழரசு மேல்சிகிச்சைக்காக தர்மபுரியில் உள்ள தனியார் ஆஸ்பத்திரியில் சேர்க்கப்பட்டார். அங்கு அவருக்கு தீவிர சிகிச்சை அளிக்கப்பட்டு வருகிறது. இருப்பினும் அவரது உயிர் ஊசல் ஆடுகிறது. இந்த சம்பவம் குறித்து தகவல் அறிந்ததும் போலீசார் விசாரணை நடத்தினர்.